საქართველო გატარებული ეკონომიკური რეფორმების შედეგად კიდევ ერთხელ აუმჯობესებს ქვეყნის რეიტინგს. „The Heritage Foundation"-ისა და „The Wall Street Journal"-ის კვლევის მიხედვით მსოფლიო ეკონომიკური თავისუფლების ინდექსით 2010 წელს საქართველომ 26-ე პოზიციით ძირითად თავისუფალი ქვეყნების ჯგუფში გადაინაცვლა.
"ჩვენ სერიოზულ წარმატებას მივაღწიეთ, რადგან ეს ერთ-ერთი ყველაზე სანდო ინდექსია მსოფლიოში. იგი სარგებლობს ძალიან დიდი ნდობით მსოფლიო ინვესტორებს შორის. საქართველოს ახალი პოზიცია გზავნილია მათთვის, რომ საქართველოში ბიზნესის წარმოება, მათი ფულის დაბანდება, გაცილებით ადვილია, ვიდრე ამ ინდექსში მოხვედრილ 200-მდე ქვეყანაში," - განაცხადა ფინანსთა მინისტრმა კახა ბაინდურაშვილმა.
მინისტრის თქმით, აღნიშნული რეიტინგის მიხედვით, საქართველო ერთი ბლოკიდან მეორეში გადავიდა.
"ეს ინდექსი მოიცავს ხუთ ბლოკს. საქართველო საშუალოდ გახსნილი ქვეყნების ბლოკიდან ძირითადად თავისუფალი ქვეყნების რიცხვში გადავიდა და ეკონომიკური თავისუფლების ინდექში 26-ე ადგილზე აღმოჩნდა", _ აცხადებს კახა ბაინდურაშვილი.
აღსანიშნავია, რომ ამ ინდექსით საქართველოს მე-14 ადგილი უკავია ევროპის ქვეყნებს შორის და ლიდერობის ჩვენი რეგიონის სახელმწიფოთა შორის. ქვეყანამ წინ წაიწია ისეთ მაჩვენებლებში როგორებიცაა: ბიზნესის თავისუფლება, საგადასახადო და სალიცენზიო გარემო, შრომის ბაზრის თავისუფლება. მსოფლიო ეკონომიკური თავისუფლების რეიტინგში საქართველომ გაუსწრო ბელგიას, საფრანგეთს, ესპანეთს, ლატვიას, ლიტვას, ბულგარეთს, საბერძნეთს, იტალიას, რუსეთს, სომხეთს, აზერბაიჯანს. რეიტინგში პირველ ადგილი ჰონგკონგს უკავია