"დემოკრატიული მოძრაობა - ერთიანი საქართველოს" ლიდერის ნინო ბურჯანაძის განცხადებით, ოპოზიციას არჩევნები უნდა, მაგრამ სააკაშვილის წასვლის შემდეგ.
"ხელისუფლება მიზანმიმართულად ერევა ოპოზიციურ პარტიათა მოქმედების პროცესში, რის შედეგადაც შეიქმნა ახალი პოლიტიკური რეალობა - "მომლაპარაკებელი" და "შეურიგებელი" ოპოზიცია, არჩევნებისა და აქციების გზა. დიახ, ჩვენ გვინდა არჩევნები, მაგრამ სააკაშვილის წასვლის შემდეგ", - განაცხადა ბურჯანაძემ დღეს გამართულ პრესკონფერენციაზე.
ამასთან, მისი თქმით, ის დარწმუნებულია, რომ "სააკაშვილი არ დათმობს მონოპოლიას არჩევნების შედეგებზე, არ შეცვლის საარჩევნო გარემოს, არ დათმობს მონოპოლიას ინფორმაციაზე, არ გაანთავისუფლებს მედიას".
"ამიტომ, ნებისმიერი არჩევნები, რომლებიც სააკაშვილის მმართველობის დროს გაიმართება მხოლოდ გააძლიერებს რეჟიმს. ამიტომ ჩვენი გზა შეურიგებელთა ფრონტზე გადის, რომლის ორგანიზებაც ინტენსიურად გრძელდება. საქართველოში არჩევნები სააკაშვილის გარეშე უნდა ჩატარდეს. ჩვენ ყოველდღიურად ვაგრძელებთ ბრძოლას შეურიგებელთა რიგების გაძლიერებისათვის. საქართველოში სააკაშვილის მიერ ორგანიზებული არჩევნები აღარ უნდა ჩატარდეს", - განმარტა მან.
