საქართველომ და უკრაინამ ხელი მოაწერეს ურთიერთთანამშრომლობის მემორანდუმს, რომელიც საქართველოში საბაჟო მომსახურეობის განვითარებასა და მოდერნიზაციას ითვალისწინებს.
როგორც უკრაინის საბაჟო სამსახურის უფროსმა იგორ კალეტნიკმა განაცხადა, უკრაინისათვის საქართველოს საბაჟოსთან თანამშრომლობა მნიშვნელოვანია და დღეს გაფორმებული ხელშეკრულება ორ ქვეყანას შორის სავაჭრო ურთიერთობების გაფართოებას შეუწყობს ხელს.
"ჩვენ დღეს ქართულ მხარესთან ორი ხელშეკრულება გავაფორმეთ, რომელიც ითვალისწინებს გადამზადებასა და ინფორმაციის გაცვლას. აღსანიშნავია, რომ წელს სტატისტიკური მონაცემების თანახმად, უკრაინა საქართველოს შორის ტვირტთბრუნვა 25 პროცენტით გაიზარდა გასული წლის ანალოგიურ პერიოდთან შედარებით. აღსანიშნავია, რომ გასულ წელს ქვეყნებს შორის ბრუნვა 41 პროცენტით დაეცა, რაც კრიზისით იყო გამოწვეული და დღეს გაფორმებული ხელშეკრულების თანახმად კი გადამზიდავებს და ბიზნესმემნებს საბაჟოებზე დიდხანს დაყოვნება აღარ მოუწევთ და ინფორმაციის გაცვლა ონლაინრეჟიმში მოხდება, რაც საშუალებას მისცემს ორივე მხარეს იცოდეს თუ რა რაოდენობისა და რა სახის ტვირთი შედის მის ქვეყანაში", - განაცხადა უკრაინის საბაჟო სამსახურის უფროსმა კალეტნიკმა.
საქართველოს ფინანსთა სამინისტროს შემოსავლების სამსახურის უფროსის გიორგი ცხაკაიას განცხადებით, საქართველოსათვის უკრაინის საბაჟო სამსახურთან მჭიდრო თანამშრომლობა მნიშვნელოვანია.
"კარგია, როდესაც გვეცოდინება თუ რა რაოდენობის ტვირთი შემოდის ქვეყანაში და ამ ინფორმაციას ონლაინრეჟიმში მივიღებთ, რაც თავისთავად მეწარმეებს მეორე ქვეყნის საბაჟო სამსახურთან ურთიერთობას გაუადვილებს", - განაცხადა ცხაკაიამ.
შეგახსენებთ, რომ 18 სექტემბერს უკრაინის საბაჟო სამსახურის ხელმძღვანელი აჭარაში იმყოფებოდა. აჭარის მინისტრთა კაბინეტისა და უკრაინის საბაჟო უწყების წარმომადგენელთა შეხვედრაზე საუბარი ორ ქვეყანას შორის სამომავლო საბაჟო ურთიერთობებს შეეხო. საუბარი იყო მოახლოებული ციტრუსის სეზონის შესახებაც. უკრაინული მხარე ციტრუსის საბაზრო ფასითაც დაინტერესდა.