არსებული სისტემა, საშუალებას გვაძლევს, რომ თვითონ დავზოგოთ საკუთარი თავისთვის,“ - აღნიშნული განცხადება საქართველოს საფონდო ბირჟის გენერალურმა დირექტორმა, გიორგი ფარესიშვილმა, „რუსთავი 2“-ის ეთერში დაგროვებითი საპენსიო რეფორმის შეფასებისას გააკეთა.
გიორგი ფარესიშვილი ამბობს, რომ მსოფლიო ბანკის გათვლებით, 2030 წელს საქართველოში იქნება 950 ათასი პენსიონერი, დღეს არსებული 700 ათასის ნაცვლად და შრომისუნარიანი მოსახლეობის რაოდენობა შემცირდება.
ფარესიშვილისათვის მიუღებელია, რომ ახალ საპენსიო სისტემასა და დაკარგულ ანაბრებს შორის პარალელს ავლებენ.
„ნდობას რაც შეეხება, ყველას გვახსოვს ის მძიმე მაგალითი რაც ჩვენი მშობლების თაობას დაემართა როდესაც საბჭოთა კავშირი დაინგრა და ასე ვთქვათ დაიკარგა ყველა ის ანაბარი რაც ამ ხალხს ქონდა. ავადსახსენებელი. ანალოგია დღეს არსებულ ახალ საპენსიო სისტემასთან არის აბსოლუტურად არასწორი, იმიტომ რომ მაშინ სწორედ იმიტომ დაკარგა ხალხმა ყველაფერი, რომ არანაირი დაგროვება მოსახლეობის მიერ საკუთარ, კერძო პირად ანგარიშებზე არ ხდებოდა. ეს ვალდებულება პენსიის გასტუმრების ქონდა აღებული მაშინდელ სახელმწიფოს, საბჭოთა კავშირს და როდესაც ეს სახელმწიფო გარდაიცვალა, მან გადაიყოლა ყველა თავისი ვალდებულება და ხალხი დარჩა ყველაფრის გარეშე. ეს არსებული სისტემა რომელიც დღეს, ანუ ამა წლის პირველი იანვრიდან ამოქმედდა, ამისგან განსხვავებით სახელმწიფოს ხელში კი არ აბრუნებს ამ ვალდებულებას, არამედ პირიქით სახელმწიფოსგან დისტანცირდებას ახდენს და ჩვენ თითოეულ ადამიანს, თითოეულ მოქალაქეს ამ ქვეყნისას გვაძლევს საშუალებას რომ ჩვენ თვითონ დავზოგოთ ჩვენი საკუთარი თავისთვის“, - განაცხადა ფარესიშვილმა.
ფარესიშვილმა აღნიშნა, რომ არსებული საპენსიო სისტემა მუშაობს მანამ, სანამ ახალგაზრდა და შრომისუნარიანი დასაქმებული მოსახლეობის რაოდენობა არის საკმარისი იმისთვის, რომ მათი გადახდილი გადასახადებით გადაუხადონ პენსია პენსიაში გასულ ადამიანებს, მაგრამ ეს სისტემა ინგრევა და ვეღარ მუშაობს მაშინ, როდესაც დემოგრაფიული სიტუაცია ქვეყანაში იცვლება ისე რომ ახალგაზრდა ადამიანების, შრომისუნარიანი ადამიანების რაოდენობა მცირდება პროპორციულად პენსიაში გასულ ადამიანებთან შედარებით და უბრალოდ ეს ფული ამ ხალხის გადახდილი თანხები აღარ ყოფნის ფიზიკურად პენსიონერებს.
"ჩვენ არა მარტო ვდგავართ, ეს საფრთხე უკვე დაწყებულია, თქვენ იცით რომ დემოგრაფიული ვითარება საქართველოში ძალიან არასახარბიელოა, მაგრამ სულ რამდენიმე წელიწადში ის ბევრად უფრო უარესდება ერთი მარტივი მიზეზის გამო - ეხლა რეპროდუქციულ ასაკში შემოდის სწორედ ის თაობა, რომელიც გასული საუკუნის 90-იან წლებში დაიბადა. როდესაც ქვეყანაში იყო სამოქალაქო ომი, შიმშილი და დიდი გაჭირვება, როდესაც ქვეყანაში იყო საშინელი მიგრაცია სწორედ ახალგაზრდა შრომისუნარიანი მოსახლეობის და რეალურად მოსახლეობა ფიზიკურად შემცირდა ქვეყანაში, შრომისუნარიანი მოსახლეობა განსაკუთრებით. ეს ხალხი შემოდის ეხლა რეპროდუქციულ ასაკში და ჩვენ სულ რამდენიმე წელიწადში დავინახავთ მკვეთრ ვარდნას შობადობაში, ეს არის უბრალოდ კრიზისი, რომელიც გველოდება. ეს არის ჩათვალეთ ნაღმი, რომელიც აფეთქდება", - თქვა ფარესიშვილმა.
საპენსიო ფონდის რეფორმა 2019 წლის პირველი იანვრიდან ამოქმედდა. დაგროვებითი პენსიის რეფორმაში ჩართვა სავალდებულოა ყველა იმ მოქალაქისთვის, რომელიც 2018 წლის 6 აგვისტომდე არ იყო 40 წლის. ფორმულის მიხედვით, დასაქმებული საკუთარი ხელფასიდან, იგულისხმება დღგ-ს ჩათვლით ხელფასი, იხდის 2%-ს. 2%-ს იხდის დამსაქმებელიც და ასევე სახელმწიფოც.
