„ეს ფული უკვე თქვენია. დაცულია უფრო მეტად, ვიდრე თქვენი ნებისმიერი სხვა საკუთრება“, - აცხადებს საპენსიო სააგენტოს დირექტორი ლევან სურგულაძე. როგორც სურგულაძემ რუსთავი 2-ის ეთერით, გადაცემა “არჩევანში“ განაცხადა, დაგროვებითი საპენსიო სისტემის ფარგლებში შეგროვებული თანხის დაბანდება, კანონმდებლობის მიხედვით, ფინანსურ ინსტიტუტებში ხდება.
“თანხა ბანდდება, როგორც კანონში წერია სიტყვა სიტყვით, კეთილსაიმედო ფინანსურ ინსტრუმენტებში, ანუ ეს არის ფასიანი ქაღალდები, რომლებსაც გამოუშვებენ კომპანიები, მათ შორის ბანკები და ნებისმიერი სხვა კომპანია, ეს შეიძლება იყოს წილობრივი და საკრედიტო ფასიანი ქაღალდი”, - აღნიშნა სურგულაძემ.
საპენსიო სააგენტოს დირექტორი საზოგადოების საპენსიო რეფორმისადმი საზოგადოების შიშებსაც გამოეხმაურა და განაცხადა, რომ „ეს არის ბუნებრივი, არაინფორმირებულობისგან გამოწვეული შიშები. მინდა გითხრათ, რომ ყველა ევროპულ ქვეყანაში, ამერიკაშიც, დაგროვებითი საპენსიო ფონდები წარმატებულად მოქმედებენ... ეს ფონდი არის დაგროვებითი საპენსიო ფონდი, ანუ თქვენ პრაქტიკულად თქვენს საპენსიო ინდივიდუალურ ანგარიშზე გერიცხებათ თანხა”.
მისივე თქმით, საპენსიო ფონდის გაკოტრება გამორიცხულია, იმიტომ, რომ ინვესტირება ხდება მაღალი დონის პროფესიონალების მიერ. ეს იქნება დივერსიფიცირებული ფონდი.
„გამოცხადებული გვაქვს საინვესტიციო საბჭოს წევრობაზე ვაკანსიები, იქნებიან მაღალი რანგის პროფესიონალები, დიდი გამოცდილებით ამ სფეროში და ასევე შევარჩევთ უფროს საინვესტიციო ოფიცერს, რომელიც უშუალოდ განახორციელებს საინვესტიციო პროცესს.
პორტფელი იქნება დივერსიფიცირებული, იქ ერთი კომპანია რომ გაკოტრდეს, ფონდს არანაირად არ დაარტყამს, იმიტომ, რომ რისკები იქნება, დათვლილი, ზუსტად შეფასებული და ყოველდღე მოხდება ამ რისკის მონიტორინგი და რაოდენობრივი შეფასება. რისკის კონტროლი არ მისცემს საშუალებას საინვესტიციო სამსახურს, აიღოს იმაზე მეტი რისკი, რაც იქნება გაწერილი საინვესტიციო პოლიტიკაში და ეს პროცესები ძალიან მკაცრად გაკონტროლდება, ფონდის გაკოტრება გამორიცხულია, უბრალოდ“, - აღნიშნა სურგულაძემ.
ცნობილია, რომ საპენსიო დანაზოგებზე არ ვრცელდება არანაირი აღსრულების მექანიზმი. “ვისი ვალიც არ უნდა გქონდეთ, სახელმწიფოსი, ბანკის თუ ეს იქნება ნებისმიერი სხვა პირი, თქვენს დანაზოგს ვერავინ ვერ შეეხება, მათ შორის სასამართლოც“, - განმარტავს საპენსიო სააგენტოს ხელმძღვანელი.
კანონმდებლობის მიხედვით, თუ დაგროვებითი საპენსიო სისტემის ბენეფიციარი საპენსიო ასაკამდე ვერ მიაღწევს, მაშინ დაგროვებული ქონება მემკვიდრეს გადაეცემა.
რაც შეეხება დაგროვებითი საპენსიო სისტემიდან 40 წელს გადაცილებული პირების გასვლას, რომლებიც ამ სისტემაში ავტომატურად ჩაერთვნენ, ავტომატურადვე ვერ მოხდება. მისი თქმით, მსურველი სააგენტოში უნდა მივიდეს და განცხადება დაწეროს.
„ჩვენ რა თქმა უნდა, განვიხილეთ ელექტრონული განცხადების მიღება, მაგრამ ეს მაშინვე გამოვრიცხეთ, იმიტომ რომ ეს დაკავშირებულია ფულადი თანხების განკარგვასთან. არც ერთი ბანკი თქვენ არ გაგიხსნით ანგარიშს, ან დაგიხურავთ თუ თქვენ ერთხელ მაინც არ მიხვედით ბანკში ამ ოპერაციის ჩასატარებლად, ანუ პირადი იდენტიფიცირება თუ არ მოახდინეთ. პროცესი იქნება საკმაოდ მარტივი. რა თქმა უნდა, გახსნა მოხერხდა იმიტომ, რომ იქ განკარგვაზე არ იყო საუბარი, იქ ბუღალტერი რიცხავდა პირდაპირ, პრობლემა არ იყო, მაგრამ აი, დახურვას, სადაც ჩვენ უკვე თანხები უნდა დავაბრუნოთ, გვჭირდება რომ ადამიანი ან მისი კანონიერი წარმომადგენელი ვნახოთ, რომელიც შემოიტანს განცხადებას“, - განმარტავს სურგულაძე.