სლოვაკეთში ამერიკის შეერთებული შტატების ელჩად ამერიკელ დიპლომატს, აშშ-ის სახელმწიფო მდივნის თანაშემწის მოადგილეს ევროპისა და ევრაზიის საკითხებში ბრიჯიტ ბრინკს წარადგენენ. ამის შესახებ თეთრი სახლის მიერ გავრცელებულ ოფიციალურ განცხადებაშია ნათქვამი.
სხვადასხვა დროს ბრიჯით ბრინკი მუშაობდა აშშ-ის დიპლომატიურ მისიებში უზბეკეთში, საბერძნეთში, თურქეთსა და საქართველოში.
შეგახსენებთ, რომ გასული წლის ბოლოს, მედიაში გავრცელდა ინფორმაცია იმის შესახებ, რომ საქართველოს მთავრობამ აშშ-ის ელჩად ამერიკელი დიპლომატის ბრიჯით ბრინქსის კანდიდატურა დაბლოკა, რადგან მთავრობაში მიიჩნევენ, რომ ის ქვეყნის ყოფილი პრეზიდენტის, მიხეილ სააკაშვილის მიმართ ზედმეტად კეთილგანწყობილია.
სკანდალი ატყდა მას შემდეგ, რაც ავტორიტეტულმა გამოცემამ Foreighn Policy-მ გამოაქვეყნა ოპუსი, რომლის ავტორი ამტკიცებს, თითქოს თბილისმა უარი უთხრა ვაშინგტონის ნომინირებულ კანდიდატს, გამოცდილ დიპლომატ ბრიჯით ბრინკს, „აგრიმანის“ გადაცემაზე, ამიტომ აშშ, თურმე, ან ვერ ახერხებს ელჩის დანიშვნას, ან საქართველოს ხელისუფლების „ჯინაზე“ არ ნიშნავს ელჩს ერთგვარი „დიპლომატიური დემარშის“ სახით: „თუ იმას არ მიღებთ ვისაც მე ვაგზავნი, მაშინ ჩემი ელჩი საერთოდ არ გეყოლებათო“.
