დღეს, 12 საათზე, გურჯაანის რაიონულ სასამართლოში “ნაციონალური მოძრაობის“ ერთ-ერთი ლიდერის, დავით კირკიტაძის ბრალდების სისხლის სამართლის საქმეზე, სხდომა გაიმართება. დღევანდელ სასამართლო პროცესზე მხარეები შესავალი სიტყვით წარსდგებიან.
დავით კირკიტაძე გურჯაანის რაიონული სასამართლოს მოსამართლემ 12 თებერვალს პატიმრობაში დატოვა. მან დაცვის მხარის შუამდგომლობა არ გაითვალისწინა. ადვოკატები ოპოზიციონერი წევრის საპატიმროდან გათავისუფლებას ითხოვდნენ. უფლებადამცველმა გიორგი კონდახიშვილმა მოსამართლეს მიმართა, რომ 5 ათას ლარიანი გირაოს სანაცვლოდ კირკიტაძე დარბაზიდანვე გაეთავისუფლებინა. დავით კირკიტაძე ბრალდებას უარყოფს.
შეგახსენებთ, გაერთიანებული ოპოზიციის წევრი დავით კირკიტაძე 17 დეკემბერს დააკავეს. კირკიტაძე დაკავებულია ველისციხეში გამართულ აქციაზე პოლიციელზე თავდასხმისთვის, ფიზიკური შეურაცხყოფისა და ქონების დაზიანებისთვის.
