ზუგდიდის N6 სკოლაში ინსპექტირების შედეგად ამ ეტაპზე დანაშაულის ნიშნები არ იკვეთება, – ამის შესახებ გენერალურ პროკურატურაში აცხადებენ.
მათი თქმით, საკითხის შესწავლა გრძელდება.
„საქართველოს გენერალურმა პროკურატურამ ზუგდიდის N6 საჯარო სკოლაში ჩატარებული ინსპექტირებისას სავარაუდო კანონდარღვევის ფაქტების შესწავლა ბაჩანა შენგელიას განცხადებაში დასახელებული გარემოებების მიხედვით დაიწყო.
დამატებითი წერილობითი ინფორმაციის მისაღებად, საგამოძიებო უწყებაში, ბაჩანა შენგელიას გარდა, გამოიკითხნენ განათლების სამინისტროს აუდიტის დეპარტამენტის უფროსი და ინსპექტირების სამსახურის თანამშრომლები.
ამ ეტაპზე მოპოვებული ინფორმაციით, დანაშაულის ნიშნები არ იკვეთება. გრძელდება საკითხის შესწავლა და შედეგების შესახებ საზოგადოებას დამატებით მიეწოდება ინფორმაცია“, – განუცხადეს საზოგადოებრივ მაუწყებელს პროკურატურაში.
ცნობისთვის, ზუგდიდის მე-6 საჯარო სკოლის დირექტორი, ია კერზაია 9 დეკემბერს გარდაიცვალა.
ია კერზაია ინსულტის დიაგნოზით, საავადმყოფოში მძიმე მდგომარეობაში იმყოფებოდა და მკურნალობას გადიოდა, თუმცა ექიმებმა მისი გადარჩენა ვერ შეძლეს.
მისი ჯანმრთელობის მდგომარეობა მას შემდეგ გაუარესდა, რაც სკოლაში გენერალური ინსპექცია შევიდა.
სკოლის დირექტორი ამბობდა, რომ სკოლაში ინსპექციის შესვლა არჩევნებს უკავშირდებოდა.
კერზაია აბობდა, რომ რაც დირექტორმა პედაგოგების საარჩევნო პროცესში უკანონოდ ჩართვაზე უარი თქვა, ანონიმური წერილის საფუძველზე ინსპექციამ თბილისიდან ზუგდიდში ორი თანამშრომელი გაგზავნა და მეექვსე სკოლის შემოწმება დაავალა. შემოწმების დღეს რეგიონს წყალი არ მიეწოდებოდა და სკოლაშიც საპირფარეშოები იყო გაუმართავი.
