სრულიად დაიმსხვრა მითი პატრიარქის მწყემსი კეთილობის შესახებ, ჩემთვის პირადად, როგორც ჭყონდიდელი მიტროპოლიტისთვის, - განაცხადა ჭყონდიდელმა მიტროპოლიტმა, მეუფე პეტრემ ტელეკომპანია“პირველის ეთერში“ წმინდა სინოდის 27 დეკემბერის სხდომაზე საუბრისას.
“ჯერ ვსაუბრობდით უკრაინის თემაზე. ვთქვი, რომ უკრაინის საკითხის გარდა ასევე აუცილებლად მიმაჩნია, წმიდა სინოდზე იქნას განხილული ჩვენი უდანაშაულო მღვდლის თემა და ციანიდის საქმე. მითხრეს რეპლიკებით, რომ როდესაც ამოიწურება უკრაინის საკითხი, შემდეგ გადავალთ სხვა საკითხებზე. სხვა საკითხებით გაგრძელდა და ბოლოს, როდესაც მივედი მიკროფონთან და დავიწყე საუბარი - მე მინდა, ეს საჯაროდ ვთქვა და იცოდეს საზოგადოებამ - პატრიარქი წამოდგა და შებრუნდა ღვთისმშობლის ხატისკენ, ანუ სინოდის სხდომის დასრულების ლოცვა დააწყებინა მის გვერდით მჯდომ მღვდელმთავარს, რითაც მიმაჩნია, რომ დათვური სამსახური გაუწიეს მას. დღეს სრული პასუხისმგებლობით ვაცხადებ, რომ გაჩენილი ბზარი, რომელიც ჩვენში არსებობდა განსაკუთრებით ბოლო მოვლენების შემდეგ, გუშინ სრულიად დაიმსხვრა მითი პატრიარქის მწყემსი კეთილობის შესახებ, ჩემთვის პირადად, როგორც ჭყონდიდელი მიტროპოლიტისთვის“, - თქვა მეუფე პეტრემ.
როგორც ცნობილია, წმინდა სინოდის სხდომაზე მღვდელთმავრებმა გუშინ, 27 დეკემბერს იმსჯელეს. სხდომის დასრულების შემდეგ, მღვდელმთავრებმა განაცხადეს, რომ სინოდი საბოლოო გადაწყვეტილებას მას შემდეგ მიიღებს, რაც 2019 წლის 6 იანვარს მსოფლიო პატრიარქი ბართოლომეოსი უკრაინის ეკლესიის მწყემსმთავარს ეპიფანეს ავტოკეფალიის ტომოსს გადასცემს.
შეგახსენებთ, რომ 15 დეკემბერს, კიევში, წმინდა სოფიას ტაძარში, უკრაინის ეკლესიების გამაერთიანებელ კრებაზე უკრაინული ეკლესიის მწემსმთავრად, 39 წლის მიტროპოლიტი ეპიფანე აირჩიეს, რომელიც პატრიარ ფილარეტის კანდიდატურას წარმოადგენდა.
