სასამართლო სისტემაში მე მაქვს გარკვეული ავტორიტეტი. თქვენ შეგიძლიათ გაიკითხოთ, რას ფიქრობენ მოსამართლეები ლევან მურუსიძესთან დაკავშირებით, - თქვა ტელეკომპანია „პირველის“ ეთერში ლევან მურუსიძემ, რომელიც დღეს იუსტიციის უმაღლესმა საბჭომ სააპელაციო სასამართლოს მოსამართლედ უვადოდ აირჩია.
მისივე თქმით, მის გასაუბრებას ბევრი უყურებდა და მისი არჩევბით ძალიან ბევრი გახარებული იყო.
„ჩემს გასაუბრებას, სასამართლო სისტემაში ძალიან ბევრი უყურებდა და ძალიან ბევრმა მომილოცა და ძალიან ბევრი გახარებული იყო, ვინაიდან მიაჩნიათ, რომ ჩვენ ერთად ძალიან დიდი ნაბიჯები გადავდგით. საზოგდოებაშიც, ვინც მიცნობს და ვისაც აქვს რაიმე კავშირი და შეხება, მათ სხვა შეხედულება აქვთ. ვინც არ მიცნობს, იმასთან მინდა მივიტანო ამბავი, რომ რეალობა რა არის, ვინ არის და რას წარმოადგენს ლევან მურუსიძე. ამიტომ თუ მექნება ამის საშუალება, კარგიათქო. მზად ვარ ნებისმიერ შეკითხვას გავცე პასუხი, როგორც დღეს, როდესაც ქალბატონი ანა იყო მოსული და ქალბატონი ნაზი. ვეცადე რომ ყველა შეკითხვაზე გამეცა პასუხი. თუ ეს არ არის საკმარისი, კიდევ გავცემ შეკითხვებს პასუხს“, - თქვა მურუსიძემ.
შეგახსენებთ, რომ დღეს ლევან მურუსიძე სააპელაციო სასამართლოს მოსამართლედ უვადოდ დაინიშნა. მას საბჭოს 11-მა წევრმა მისცა ხმა. მურუსიძესთან იუსტიციის უმაღლესი საბჭოს წევრების გასაუბრება დღეს ჩატარდა. ერთი წევრის ხმა გაბათილდა, ხოლო ორი წინააღმდეგი იყო. წინააღმდეგ მისცეს ხმა არამოსამართლე წევრებმა, ნაზი ჯანეზაშვილმა და ირმა გელაშვილმა, ანა დოლიძემ კი გააბათილა ბიულეტენი, რადგან უკანონოდ მიიჩნევდა ამ პროცესს. ლევან მურუსიძე მანამდეც სააპელაციო სასამართლოს მოსამართლე იყო, თუმცა, არა უვადოდ დანიშნული. წარსულში ის უზენაესი სასამართლოს მოსამართლეც იყო, ასევე - იუსტიციის უმაღლესი საბჭოს მდივანი.
