ხანდახან მინატრია, რომ ჩემს წინააღმდეგ სისხლის სამართლის საქმე აღიძრას და მერე მექნება საშუალება, რომ დავამტკიცო, რაზეც მედავებიან, ეს არ არის სიმართლეთქო, - თქვა ტელეკომპანია „პირველის“ ეთერში ლევან მურუსიძემ, რომელიც დღეს იუსტიციის უმაღლესმა საბჭომ სააპელაციო სასამართლოს მოსამართლედ უვადოდ აირჩია.
მისი თქმით, მკვლელობაში ბრალდებულს აქვს დაცვის უფლება და მას ამის საშუალება არ ეძლეოდა.
„ხანდახან, მინატრია, რომ ჩემს წინააღმდეგ სისხლის სამართლის საქმე აღიძრას და მერე მექნება საშუალება, რომ დავამტკიცო, რაზეც მედავებიან, ეს არ არის სიმართლეთქო. ასეთ დღეებამდეც კი მივსულვარ. მე მზად ვარ, თუნდაც კომისია შეიქმნას, თუნდაც შეიკრიბონ ცნობილი პროცესუალისტები, იურისტები და ერთხელ და სამუდამოდ, ხომ შეიძლება ეს საკითხი გავაიროთ და მომეცეს საშუალება, რომ საკუთარი თავი დავიცვა. ამიტომ, ახლა, თავის დროზე ხომ გითხარით, წინააღმდეგიც არ ვიყავი თუ რაღაცა და რამე, რასაც ვფიქრობდი და ვნატრობდი. მკვლელობაში ვისაც ედება ბრალი, იმას აქვს დაცვის უფლება და მე, მოსამართლეს, რომელსაც მაქვს 13-წლიანი გამოცდილება, არ მეძლეოდა იმის საშუალება, რომ თავი დამეცვა. დღეს ვეცადე ეს განმეხორციელებინა“, - თქვა ლევან მურუსიძემ.
შეგახსენებთ, რომ დღეს ლევან მურუსიძე სააპელაციო სასამართლოს მოსამართლედ უვადოდ დაინიშნა. მას საბჭოს 11-მა წევრმა მისცა ხმა. მურუსიძესთან იუსტიციის უმაღლესი საბჭოს წევრების გასაუბრება დღეს ჩატარდა. ერთი წევრის ხმა გაბათილდა, ხოლო ორი წინააღმდეგი იყო. წინააღმდეგ მისცეს ხმა არამოსამართლე წევრებმა, ნაზი ჯანეზაშვილმა და ირმა გელაშვილმა, ანა დოლიძემ კი გააბათილა ბიულეტენი, რადგან უკანონოდ მიიჩნევდა ამ პროცესს. ლევან მურუსიძე მანამდეც სააპელაციო სასამართლოს მოსამართლე იყო, თუმცა, არა უვადოდ დანიშნული. წარსულში ის უზენაესი სასამართლოს მოსამართლეც იყო, ასევე - იუსტიციის უმაღლესი საბჭოს მდივანი.
