სამართლიანობის ირგვლივ უნდა შეიქმნას მოძრაობა, ჩვენ უნდა შევქმნათ ეს მუხტი, - განაცხადა ტელეკომპანია „პირველის“ ეთერში იუსტიციის უმაღლესი საბჭოს არამოსამართლე წევრმა ანა დოლიძემ ლევან მურუსიძის სააპალეციო სასამართლოში უვადოდ დაინიშნაზე საუბრისას.

მისი თქმით, „ქართული ოცნება“ სერიოზული ძალა არ არის და ადვილი გასამკლავებელია

„ქართული ოცნება“, ეს ხომ სერიოზული ძალა არ არის. ეს ისეთი ადვილი გასამკლავებელია, თუ მობილიზება იქნება, ეს არის არაფერი. ეს არის, პატარა რეკლამა დიდი კინოს წინ. ამას გავაკეთებთ და მგონი დრო არის. იმიტომ რომ სანამ არაფერს ვაკეთებთ, ფაქტია, გინდა ოცნებას მიმართე და ვისაც გინდა მიმართე. ფაქტია, რომ ერთ ყურში უშვებენ და მეორეში გამოდის, ჩვენი მიმართვები და ჩვენი ღაღადი“, - განაცხადა დოლიძემ და აღნიშნა, რომ სამართლიანობა დიდი ხანია უნდა ხალხს, მაგრამ ვერ აღწევს.

„ჩვენ თვითონ უნდა მოვიკრიბოთ ძალა. ვფიქრობ, რომ სამართლიანობის  იდეის გარშემო, რაც ძალიან დიდი ხანია უნდა ჩვენს ხალხს და ვერ არწევს. ეს იდეა დაუკვეთა მან „ქართულ ოცნებას“ და ვერ აღწევს. „ქართული ოცნება“  შეიძლება თავიდან იყო რაღაც, მედიაც კი შეუშვეს სასამართლოებში, მაგრამ შემდეგ, შედეგად მივიღეთ სარალიძე, შედეგად მივიღეთ მაჩალიკაშვილი, შედეგად მივიღეთ ნარკოპოლიტიკა, რომელსაც თავი ვერ მოაბა „ქართულმა ოცნებამ“ და სასამართლოებს გადააბარა და, შედეგად მივიღეთ  - ლევან მურუსიძე და მიხეილ ჩინჩალაძე“, - თქვა ანა დოლიძემ.

შეგახსენებთ, რომ დღეს ლევან მურუსიძე სააპელაციო სასამართლოს მოსამართლედ უვადოდ დაინიშნა. მას საბჭოს 11-მა წევრმა მისცა ხმა. მურუსიძესთან იუსტიციის უმაღლესი საბჭოს წევრების გასაუბრება დღეს ჩატარდა.  ერთი წევრის ხმა გაბათილდა, ხოლო ორი წინააღმდეგი იყო. წინააღმდეგ მისცეს ხმა არამოსამართლე წევრებმა, ნაზი ჯანეზაშვილმა და ირმა გელაშვილმა, ანა დოლიძემ კი გააბათილა ბიულეტენი, რადგან უკანონოდ მიიჩნევდა ამ პროცესს.  ლევან მურუსიძე მანამდეც სააპელაციო სასამართლოს მოსამართლე იყო, თუმცა, არა უვადოდ დანიშნული. წარსულში ის უზენაესი სასამართლოს მოსამართლეც იყო, ასევე - იუსტიციის უმაღლესი საბჭოს მდივანი.