ჩვენ დღეს მივაღწიეთ იმას, რომ 2019 წელი ჩინჩალაძის წელი არ იქნება, - ამის შესახებ იუსტიციის უმაღლესი საბჭოს არამოსამართლე წევრმა ანა დოლიძემ პარლამენტის მიერ უზენაესი სასამართლოს მოსამართლეობის 10 კანდიდატის დამტკიცების საკითხის გადადებასთან დაკავშირებით განაცხადა.
მისი თქმით, წარდგენილი კანდიდატები უზენაეს სასამართლოში მანდატებს არ იმსახურებენ.
„ამ შედეგს განვიხილავ, როგორც პროცესის შეჩერებას. სიაში შემავალი კანდიდატები არ იმსახურებენ ამ მანდატს, პირველ რიგში, საუბარია, რა თქმა უნდა, მიხეილ ჩინჩალაძეზე. გაზაფხულზე გადატანა დიდ საზოგადოებრივ დისკუსიას და მსჯელობას მოიტანს, ქართველი ხალხი იტყვის თავის სიტუაციას და ეს არ მოხდება საახალწლო სუფრასთან, როგორც ახლა აპირებდნენ. ეს მოგვცემს საშუალებას, რომ თუ ეს ქვეყანა იქნება დემოკრატია, ჩვენ შესაბამისი მანდატების, შესაბამისი კალიბრის იურისტები გვეყოლებიან უზენაეს სასამართლოში“, - განაცხადა ანა დოლიძემ.
ცნობისთვის, პარლამენტი უზენაესი სასამართლოს მოსამართლეთა დანიშვნის გადაწყვეტილებას მიმდინარე სესიაზე არ მიიღებს.
