"ჩვენ როდესაც არჩევნებში მოვედით ვლაპარაკობდით 100 ქარხანაზე და 4-5 ქარხანა არ აგვიშენებია ისეთი, რომ ისეთ ექსპორტს ქმნიდეს, როგორიც ფეროშენადნობია", - განაცხადა საპარლამენტო უმრავლესობის წევრმა ენძელა მაჭავარიანმა დარგობრივი ეკონომიკის კომიტეტის სხდომაზე ეკონომიკის მინისტრის მოსმენისას.
ენძელა მაჭავარიანის თქმით, მხოლოდ ტურისტიების რაოდენობის ზრდა ვერ გაზრდის ეკონომიკას, თუ ქვეყანაში არ იქნება ინდუსტრია განვითარებული.
"როდესაც თქვენ ინდუსტრიალიზაცია ახსენეთ, მე იმედი მომეცა, რომ რაღაც განვითარდებოდა ქვეყანაში. რამდენი ტურისტიც არ უნდა შემოვიდეს ქვეყანაში, ეს ვერ შექმნის კომფორტს და ვერ გაზრდის ეკონომიკას, თუ ჩვენ არ გვექნა ინდუსტრია. ჩვენ როდესაც არჩევნებში მოვედით ვლაპარაკობდით 100 ქარხანაზე და 4-5 ქარხანა არ აგვიშენებია ისეთი, რომ ისეთ ექსპორტს ქმნიდეს, როგორიც ფეროშენადნობია", - განაცხადა მაჭავარიანმა.
ენძელა მაჭავარიანი ასევე შეეხო ელექტროსადგურების მშენებლობის საკითხს და აღნიშნა, რომ აუცილებელია იმ ადამიანების ჩართულობა ვინც ცხოვრობს რეგიონებში და არ ემხრობა ელექტროსადგურების მშენებლობას.
შეგახსენებთ, რომ პარლამენტის დარგობრივი ეკონომიკისა და ეკონომიკური პოლიტიკის კომიტეტის სხდომაზე ეკონომიკის მინისტრ გიორგი ქობულიას უსმენენ.
