ვურჩევდი, გაიარონ იურიდიული კონსულტაციები, ცრუ ბრალდებებს მოეშვან, – ამის შესახებ საქართველოს პრეზიდენტის საპარლამენტო მდივანმა დიმიტრი გაბუნიამ „ქალთა მოძრაობის“ მისამართით განაცხადა.
მისი თქმით, „ქალთა მოძრაობის“ განცხადებები არაკვალიფიციური და არაკომპეტენტურია.
„ვურჩევდი, გაიარონ იურიდიული კონსულტაციები, ცრუ ბრალდებებს მოეშვან. დასაშვები კრიტიკის ზღვარი სადაც იქნება გადაცილებული, მიიღებენ იმ სამართლებრივ პასუხს, რომელიც არის გათვალისწინებული მოქმედი კანონდებლობით. ის ტექსტიდან ამოგლეჯილი კონტექსტი, რომელიც აქვს ხელზე დახვეული „ქალთა მოძრაობას“, ძალიან გთხოვთ დაინტერესებულ პირებს, ნახოთ, არის გაშუქებული ჩემი არაერთი კომენტარი და არის მოჭრილი, კონტექსტიდან ამოგლეჯილი ფრაზა და ტექსტი. რაც შეეხება არგუმენტს, თითქოს მე, როგორც საპარლამენტო მდივანი ხელს შევუშლი სექსუალური შევიწროების კანონპროექტს და ა.შ., მე მინდა დავამშვიდო ისინი, საპარლამენტო მდივანს არანაირი კომპეტენცია არ გამაჩნია ამ კანონპროექტზე რაიმე სახის გავლენა მოვახდინო. აქედან გამომდინარე, ეს არგუმენტი არის თითიდან გამოწოვილი. დაანებონ თავი ორმაგი განცხადებების კეთებას. მეორე ტურის პერიოდში ეს ხალხი არცთუ ისე სასიამოვნო ტერმინებით ამკობდა საპრეზიდენტო კანდიდატს, ქალბატონ სალომე ზურაბიშვილს. მიგვაჩნია, რომ ეს არის ჩვენი გუნდის მიმართ მცდელობა, ჩირქი მოსცხონ აბსურდული არგუმენტებით. მეტი კომენტარის გაკეთება ამასთან დაკავშირებით არ მინდა“, – განაცხადა დიმიტრი გაბუნიამ.
შეგახსენებთ, საქართველოს პრეზიდენტმა სალომე ზურაბიშვილმა დიმიტრი გაბუნია საპარლამენტო მდივნად დანიშნა. "ქალთა მოძრაობა" და ქალთა უფლებებზე მომუშავე NGO-ები სალომე ზურაბიშვილს მოუწოდებდნენ, საპარლამენტო მდივნად დიმიტრი გაბუნია არ დაენიშნა.
