ექსკლუზივი ჯარზე არც ერთ პარტიას არ უნდა ჰქონდეს და ექსკლუზივი ჯარზე არავის აქვს, - ამის შესახებ თავდაცვის მინისტრის ყოფილმა მოადგილემ, ვაკო ავალიანმა გადაცემაში „იმედი Live“ განაცხადა.
მისი თქმით, უნდა დასრულდეს მსჯელობა იმაზე, რომ რომელიმე სამხედროს რომელიმე ხელისუფლება ტრიბუნალს გადასცემს, ვინაიდან ჯარი არ არის რომელიმე ხელისუფლების, ან პარტიის კუთვნილება.
„საერთოდ, სამარცხვინოა, მსჯელობა რომ ჩვენი სამხედრო მოსამსახურე, რომელიმე ხელისუფალმა გადასცეს, რომელიმე ტრიბუნალს. ჩვენი სამხედრო მოსამსახურეები იცავენ ყველას, განურჩევლად პარტიული კუთვნილებისა და დაიცავენ ყოველთვის. ჯარი არის საქართველოსი და არა, რომელიმე პარტიის. მე მგონი ამაზე მსჯელობა უნდა დასრულდეს. ყველა მინისტრმა, რაღაც წვლილი შეიტანა საქართველოს შეიარაღებული ჯარების განვითარებაში. ნებისმიერ ხელისუფალი აქვს საშუალება თუ - არა, ზრუნავს შეიარაღებული ძალებზე. ის, რაც გაკეთდა 2012 წლიდან არაფრით არ ჯდება იმ ნარატივში, რომ ხელისუფლება ჯარს ყურადღებას არ აქცევდა, ან ჯარი უყურადღებოდ იყო მიტოვებული. თუნდაც ის რომ სამხედრო მოსამსახურეების ხელფასი, რომელიც იყო 700 დოლარი ავღანეთში მსახურების დროს, გახდა 1000 დოლარი, თუნდაც, ის რომ, ტრაგიკული შემთხვევები გვაქვს, და გარდაცვალების შემთხვევაში ერთჯერადი დახმარება იყო 15 ათასი ლარი და ეს გახდა 100 ათასი ლარი. რაც ყველაზე მნიშვნელოვანია და გაკეთდა არჩევნების შემდეგ იყო ის, რომ გარდაცვლილი სამხედროების ოჯახის წევრებს დაენიშნათ პენსია. ეს პენსია არის 1000 ლარი. ეს პენსია უნაწილდებათ, მშობლებს ან მეუღლეს, ან შვილებს, იმ ადამიანების ოჯახის წევრებს, რომლებმაც ყველაზე ძვირფასი რამ, სიცოცხლე გაწირეს საკუთარი სამშობლოსთვის. ისინი დღეს სახელმწიფოსგან დახმარებას იღებენ“, - განაცხადა ავალიანმა.
