ზამთრის სეზონის მოახლოებასთან დაკავშირებით ტყიდან საშენი და საშეშე მასალის გამოტანის პროცედურებზე კონტროლი მკაცრდება.
ტყეში საშეშე და საშენი მასალის დასამზადებლად დაინტერესებულმა პირმა ნებართვა სატყეო განყოფილებებში უნდა მიიღოს, მასალის დასამზადებლად მას მინიმუმ 15-დღიანი ვადა ეძლევა.
დამზადებული ხე-ტყის დანიშნულების ადგილამდე მისატანი კანონით განსაზღვრული ვადა 24 საათს შეადგენს, სწორედ ამ დროის განმავლობაში უნდა დატოვოს პირმა ტყის ტერიტორია.
სატყეო მეურნეობა წარმოშობისა და კანონიერების დამადასტურებელ დოკუმენტს გასცემს. ხე-ტყის მოჭრისა და ტრანსპორტირების წესებს გარემოს დაცვის ინსპექცია აკონტროლებს. რაიმე სახის დარღვევის გამოვლენის შემთხვევაში დამრღვევს კანონით გათვალისწინებული სანქციები დაეკისრება.
ტყის ფონდიდან 130 000-მდე კუბური მეტრი საშეშე მერქნის, ხოლო 180 000 კუბური მეტრი სამასალე ხე-ტყის გამოტანაა ნებადართული.