ბავშვების კვების რაციონის ხარჯზე გადაცდომები და ღალატი არავის ეპატიება, - ამის შესახებ თბილისის მერმა კახა კალაძემ ჟურნალისტებს განუცხადა.
მისი თქმით, ბაღების ნაწილის დირექტორთა გათავისუფლების საკითხის პოლიტიზირება არასწორია.
„სამწუხაროდ, ყველაფრის პოლიტიზირება ხდება ქვეყანაში. სააგენტო ყოველთვის ახორციელებს ბაღების შემოწმებას, ეს ახლა არ დაწყებულა და ამის ვალდებულება გვაქვს. ადრეც ვსაუბრობდი და ახლაც ვიმეორებ, რომ ჩვენ არავის ვაპატიებთ გადაცდომას, განსაკუთრებით იქ, სადაც საუბარია პატარებზე, ბავშვებზე. ბავშვების კვების რაციონის ხარჯზე გადაცდომები და ღალატი არ ეპატიება არავის“, - განაცხადა კალაძემ.
მისივე თქმით, ამ ამბის საპარლამენტო არჩევნებთან დაკავშირება ძალიან დიდი ტყუილი. მისივე თქმით, შემოწმებები სისტემატურად მიმდინარეობს.
„სისტემაში დაახლოებით 24 ათასი ადამიანი მუშაობს და ჩემი დაპირება იყო მუნიციპალური სერვისების განვითარება და ხელმისაწვდომობა. ჩვენ მთელი რიგი მიმართულებებით ჯერ ჯიდევ გვაქვს პრობლემები, თუმცა ყველაფერს ვაკეთებთ, რომ ეს ყველაფერი მოწესრიგდეს“, - აღნიშნა კალაძემ.
