"გაზპრომი" აზერბაიჯანში "ბრიტიშ პეტროლიუმის" აქტივების შეძენით დაინტერესდა, ამის შესახებ განცხადება კონცერნის ხელმძღვანელმა ალექსეი მილერმა გააკეთა. მისი თქმით, "გაზპრომი" სიამოვნებით შეიძენდა ბი-პის აქტივებს, თუ კომპანია მის გაყიდვას გადაწყვეტს.
ბი-პი ერთადერთი კომპანიაა პოტსაბჭოთა სივრცეში, რომელიც კასპიური ნავთობით ტრანსპორტირებას ეწევა ბაქოდან, საქართველოს გავლით თურქეთის პორტ ჯეიჰანამდე. ყოველწლიურად ამ ნავთობსადენით 35 მლნ ტონა ნავთობი გადის, რაც მსოფლიო მოპოვების 1 %-ს წარმოადგენს. რუსული მხარე მრავალი წელია ბაქო-თბილისი-ჯეიჰანის ნავთობსადენის მშენებლობის შეჩერებას ცდილობდა.
ბი-პი არის ასევე ტრანსკასპიური ნავთობსადენის ოპერატორი, რომელიც აზერბაიჯანიდან საქართველოს გავლით თურქეთის ქალაქ ერზერუმს გაზს აწვდის.
ევროკავშირი გეგმავს ამ გაზსადენის გამოყენებით, ააშენოს ნაბუკოს მაგისტრალი, რომელიც ევროპაში გაზის მიწოდების დივერსიფიცირებას შეუწყობს ხელს.
ანალიტიკოსების განმარტებით, თუ "გაზპრომი" ბი-პის აქტივებს შეიძენს, მაშინ აზერბაიჯანიდან საქართველოს გავლით ევროპაში ენერგორესურსების ტრანსპორტირებას საფრთხე შეექმნება.
შეგახსენებთ, რომ რუსეთის მთავრობის თავმჯდომარის მოადგილის იგორ სეჩინის განცხადებით, რუსეთი მზადაა მხარი დაუჭიროს რუსულ კომპანიებს ბი-პის აქტივების შეძენაში, რომელიც მექსიკის ყურეში ტექნილოგიური კატარსტოფის შემდეგ მძიმე მდგომარეობაში აღმოჩნდა.