„რესპუბლიკური პარტია“ მეორე ტურში მხარს გრიგოლ ვაშაძეს დაუჭერს, - ამის შესახებ პარტიის ერთ-ერთმა ლიდერმა ლევან ბერძენიშვილმა გაერთიანებული ოპოზიციასთან გამართული კონსულტაციების შემდეგ გამართულ ბრიფინგზე განაცხადა.
ბერძენიშვილის თქმით, გაერთიანებულ ოპოზიციასთან „რესპუბლიკურმა“ პარტიამ ყველა ის საკითხი განიხილა, რომელიც საერთო ინტერესის საგანია.
„მათ შორის ისეთი საკითხები, როგორიცაა რომ პრეზიდენტმა უნდა იზრუნოს რომ პრეამბლუაში ავიდეს ევროპული ინტეგრაციის საკითხები ნატო და ა.შ. რაც არის კონსტიტუციაში მაგრამ პრეამბლუაში არ არის. ჩვენ ასევე ვიმსჯელეთ იმაზე, რომ ვინც არიან შეძენა-შენახვაზე მსჯავრდებულები პრეზიდენტმა შეიძლება შეიწყალოს“,-ამბობს ბერძენიშვილი.
მისი თქმით, რესპუბლიკური პარტია მის აქტივში არსებული სრული რესურსით გრიგოლ ვაშაძეს მხარს დაუჭერს, თუმცა ეს არ ნიშნავს, რომ გაერთიანებულ ოპოზიციასთან ერთიანდება.
„ჩვენ მოვედით იმისათვის, რომ მხარი დავუჭიროთ გრიგოლ ვაშაძეს საპრეზიდენტო არჩევნებში. გაერთიანებულ ოპოზიციასთან სხვა საკითხებზე კავშირზე არ გვქონია საუბარი,“-ამბობს ლევან ბერძენიშვილი.
გაერთიანებული ოპოზიციის საარჩევნო შტაბში „რესპუბლიკური პარტიის“ წევრებთან კონსულტაციები გაიმართა. შეხვედრას პრეზიდენტობის კანდიდატი გრიგოლ ვაშაძეც ესწრებოდა.„რესპუბლიკური პარტიიდან“ კი ლევან ბერძენიშვილი, თამარ კორძახია და ხათუნა სამნიძე იმყოფებოდნენ.
