საქართველოში არის „ნაციონალური მოძრაობის“ ამომრჩევლების დიდი ჯგუფი, ეს არის რეალობა და ეს არის აბსოლუტურად ნორმალური, რადგან „ქართულმა ოცნებამ“ ჩვენს ქვეყანაში ააშენა ისეთი დემოკრატიული სისტემა, რომ ადამიანებს არჩევანის თავისუფლად გაკეთების საშუალება აქვთ,- ამის შესახებ იუსტიციის მინისტრმა თეა წულუკიანმა განაცხადა.
მისი თქმით, როდესაც ამას ყველა შეაფასებს, როგორც დემოკრატიული მმართველობის მოდელს, მაშინ უფრო გამარტივდება პოლიტიკური დებატი და ბრძოლა.
„ჩვენ ყველამ უნდა დავუშვათ, რომ 800 ათასი სტაბილური ამომრჩეველი ჰყავს „ნაციონალურ მოძრაობას“. მიუხედავად იმისა, არის ეს „ნაციონალური მოძრაობა“ ერთი თუ „ნაციონალური მოძრაობა“ ორი დავით ბაქრაძის სახით. როდესაც ამას ღიად შევხედავთ და ვიტყვით, რომ ეს არის მმართველობის სრულიად დემოკრატიული მოდელი, შემდეგ უფრო გაგვიადვილდება პოლიტიკური დებატიც და ბრძოლაც“, – განაცხადა თეა წულუკიანმა, რომელმაც აქვე აღნიშნა, რომ 800 ათასზე მეტ მოქალაქეს არ სურს წარსულში დაბრუნება და მეორე ტურში ამის დემონსტრირება უნდა მოხდეს.
„მეორე ტურს რაც შეეხება, ჩვენი პოლიტიკური მიზანი არის, ვაჩვენოთ რეალობა. რეალობა კი ისაა, რომ ჩვენ, ვისაც არ გვინდა წარსულში დაბრუნება, ვართ ბევრად მეტი, ვიდრე 800 ათასი ადამიანია. შესაბამისად უნდა ვმობილიზდეთ ყველა, ვიქნებით მინისტრები, „ქართული ოცნების“ ამომრჩევლები ან ის ადამიანები, რომლებიც არ არიან „ქართული ოცნების“ ამომრჩევლები, მაგრამ არ სურთ წარსულში დაბრუნება, არ სურთ გრიგოლ ვაშაძის პრეზიდენტობა. ყველანი უნდა გავერთიანდეთ“, – დასძინა თეა წულუკიანმა.
