თქვენ მოგწონთ ჩვენ მიერ შექმნილი დემოკრატია, მაგრამ ამის აღიარება არ შეგიძლიათ, – ასე მიმართა საპარლამენტო უმრავლესობის ლიდერმა არჩილ თალაკვაძემ პარლამენტის პლენარულ სხდომაზე „ნაციონალური მოძრაობისა“ და „ევროპული საქართველოს“ წევრებს.
მისი თქმით, საკითხებზე, რომელზეც ხალხმა მმართველ გუნდს თავისი პოზიცია უთხრა, იქნება ადეკვატური პოლიტიკური რეაქცია როგორც მეორე ტურამდე, ისე მის შემდეგ.
მისივე განცხადებით, „ქართულ ოცნებას“ აქვს შესაძლებლობა და გუნდი, რომელიც ამ გამოწვევას უპასუხებს, გუნდი, რომელიც ხვალინდელ დღეზე იქნება პასუხისმგებელი.
მან ახალქალაქში მომხდარ ინციდენტთან დაკავშირებით თქვა, რომ ძალადობის ესკალაცია ვაშაძის მხარდამჭერებმა დაიწყეს. რაც შეეხება სამოქალაქო ომს, მისივე თქმით, „ქართული ოცნება“ ამ ქვეყანაში ადამიანის უფლებების დაცვის და მშვიდობის გარანტია. ეს არის ერთმნიშვნელოვანი პასუხი
„რაც შეეხება ახალქალაქში მომხდარ ფაქტს, ვემიჯნებით ძალადობას და ეს ის მეთოდი არაა, რომლითაც ჩვენ არჩევნებში რაიმე შედეგს ვიღებთ. გამოძიება ამ ფაქტზე დაწყებულია. ძალადობის ესკალაცია სწორედ ვაშაძის მხარდამჭერებმა დაიწყეს, როცა დემონსტრაციულად ჩამოხიეს პლაკატები და სავარაუდოდ, მძიმე შეურაცხყოფა მიაყენეს ზურაბიშვილის მხარდამჭერებს“, – დასძინა თალაკვაძემ.
