ძალიან ვთხოვ, ალტერნატიულ ექსპერტს, ალექსანდრე გეჯაძეს, რომ სიმართლე დაწეროს!, - ამ სიტყვებით მიმართავს თემქაზე მოკლული ანა ნაცვლიშვილის მამა, მამუკა ნაცვლიშვილი დამოუკიდებელ ექსპერტს, ალექსანდრე გეჯაძეს.
სწორედ, მან უნდა ჩაატაროს დაცვის მხარის მიერ წარდგენილ საკვლევ მასალაზე ექსპერტიზა.
„დამოუკიდებელი ექსპერტი, ალექსანდრე გეჯაძე ატარებს ალტერნატიულ ექსპერტიზას. კატეგორიულად მოვითხოვ და ვაფრთხილებ მას, ღმერთი არ გაუწყრეს. დაწეროს მართალი, რაც და როგორც იყო. მასთან კონსულტაცია 300 ლარი ჯდება, პლუს ამას, ექსპერტიზასაც თანხა სჭირდება, ყველაფერი ფულზეა დამოკიდებული. ხომ შეიძლება, სხვამაც გადაუხადოს უფრო მეტი და სხვა რამე დაწეროს? ჩემი შვილი კიდევ საცდელი პოლიგონი არ არის, ვისაც რა უნდა, ის დაწეროს და რაც უნდა ის ილაპარაკოს!
არ მგონია, ადვოკატის მიერ წარმოდგენილმა ექსპერტიზის დასკვნამ სასამართლოზე იმოქმედოს, მაგრამ ხალხის აზრი კიდევ სხვა რამეა. არ მინდა ხალხში ეჭვი იყოს, რომ ამ საქმეში კიდევ ვიღაც მონაწილეობდა, კიდევ ვიღაც იყო დამნაშავე, არ მოიძებნა და გარეთ დარჩა“, - აცხადებს ნაცვლიშვილი.
ის გამოძიებას ენდობა და მისთვის პროკურატურის მიერ წარმოდგენილი მტკიცებულებები საკმარისიც და სანდოც არის.
„ჩემთვის, ბრალდების მხარის მიერ წარმოდგენილი ექსპერტიზა სანდოა და კითხვის ნიშნები არ მაქვს. მართლმსაჯულების მჯერა, რომ მას რაც საჭიროა, იმას მიუზღვავენ. აუცილებლად, უვადოს ვგულისხმობ. ალბათ, ამის მცდელობა აქვს ადვოკატს, რომ უვადო არ მიესაჯოს, თორემ, რომ არ გამართლდება, ამის ეჭვი არც არსებობს. ალბათ, მუხლი რომ შეუცვალონ, ამას ცდილობენ. ბოლომდე ვიბრძოლებ!
ძალიან ვთხოვ, ალტერნატიულ ექსპერტს, ალექსანდრე გეჯაძეს, რომ სიმართლე დაწეროს!“, - აცხადებს ნაცვლიშვილი.
ცნობისთვის, 20 წლის ანა ნაცვლიშვილის მკვლელობის საქმეზე მოკლულის შეყვარებული, ლადო გრიგალაშვილი დააკავეს, ის ჩადენილ დანაშაულს არ აღიარებს.
