სად წავალ, რას გავაკეთებ და რას ვიტყვი, ეს ივანიშვილის საქმე არ არის და არც არასოდეს იქნება, - ამის შესახებ "საერთაშორისო გამჭვირვალობა-საქართველოს" ხელმძღვანელმა ეკა გიგაურმა "ქართული ოცნების" თავმჯდომარის, ბიძინა ივანიშვილის დღევანდელ განცხადებასთან დაკავშირებით განაცხადა, რომელმაც თქვა, რომ გიგაურს რამდენჯერმე ანიშნა, NGO სექტორს ჩამოშორებოდა.
გიგაურმა ივანიშვილის ბრალდება, რომ ის 7 ნოემბრის დარბევაში მონაწილეობდა, უარყო და განმარტა, რომ ცილისწამებასთან დაკავშირებით იჩივლა კიდეც.
"ივანიშვილის ინტერვიუებს, როგორც წესი, არ ვუსმენ. ნაკლებად მაინტერესებს მისი მოსაზრება ჩემთან დაკავშირებით. მითხრეს, რომ კვლავ მახსენა სასამართლოზე არ დადისო და 7 ნოემბერი მისი დარბეულიაო. მოკლოდ იჭორავა! კიდევ ერთხელ განვმარტავ, მე ვიჩივლე მურუსიძის სასამართლოში ცილისწამებისთვის ივანიშვილის მიერ მართული პირების წინააღმდეგ. მათ კომპენსაციის სახით 30 თეთრს ვთხოვ და იმ ფაქტების უარყოფას, რაც გააჟღერეს ჩემთან მიმართებაში. მე ჩემი ადვოკატის მეშვეობით არასოდეს გამიცდენია სასამართლოს პროცესი, რომელსაც ბოლომდე მივიყვან, სტრასბურგშიც რომ დამჭირდეს საჩივრის შეტანა. ამ სასამართლო პროცესზე მე თავის სამართლებელი არაფერი მაქვს. თავი უნდა იმართლონ ცილისმწამებლებმა. მოკლედ სად წავალ, რას გავაკეთებ და რას ვიტყვი ეს ივანიშვილის საქმე არ არის და არც არასოდეს იქნება. ვურჩევდი, რომ მსგავს რიტორიკას შეეშვას, რადგანაც ასეთი დამოკიდებულება არასამთავრობო სექტორის მიმართ პირველ რიგში ქვეყნის რეპუტაციას აზიანებს. უკვე ყველაფერი ნათელია, ყველაფრის ლუსტრაცია მოხდა და ახლა ზუსტად ვიცი ჩემზე თავდასხმების უკან ვინც დგას", - წერს გიგაური სოციალურ ქსელში.
"ეკა გიგაურს მინიშნებებით ვანიშნე, რომ კარგი იქნება, გავიდეს ამ სექტორიდან, რადგან მისი იქ ყოფნა ცუდ სამსახურს უწევს სამოქალაქო სექტორს", - ამის შესახებ დღეს "ქართული ოცნების" თავმჯდომარე ბიძინა ივანიშვილმა "საერთაშორისო გამჭვირვალობა-საქართველოს" ხელმძღვანელთან დაკავშირებით განაცხადა.
