ყველგან ყველაფერი მოიარა. ძალიან ცუდად მოიქცა ჩვენთან. ჩემთან მაგას დიდი ხანია აღარ შემოესვლება. სადაც კი შეიძლებოდა, ყველას მიეკედლა და ჩემი აზრით, „ნაციონალებთან“ გაფორმდა, მაგის პოზიციიდან გამომდინარე. მე არ ვიცი ხელფასს უხდიან, არ უხდიან, მაგრამ პოზიციას, რასაც დღეს ეგ იჭერს, ერთი ერთზე ასხამს წყალს ნაციონალების წისქვილზე, მაგრამ მაგის არავითარი პრობლემა არ გვაქვს, - ამის შესახებ „ქართული ოცნების“ თავმჯდომარე ბიძინა ივანიშვილმა ექსპერტ გია ხუხაშვილთან დაკავშირებით განაცხადა.
მისი თქმით, ხუხაშვილი უნიჭო ექსპერტია. მისივე თქმით, ხუხაშვილს ერთი პერიოდი ილუზია ჰქონდა, რომ ეგ მართავდა ყველა პროცესს.
„ამ დროს, როდესაც ვიხსენებ მის გამონათქვამებს, არაფრის ანალიზის უნარი არ ჰქონია. შევახსენებ, როდესაც წინა საპრეზიდენტო არჩევნები იყო, სადაც მარგველაშვილი დომინირებდა, მახსოვს, მაგის ანალიზს უკვე აღარ ვისმენდი და ლამაზად ვწევდი, რომ არ მეწყენინებინა, მაინც გამალებით მიაღწია, ჩამოვიდა ურეკში ჩემთან და იქ დავუხურე პრინციპში მაგის ანალიზი. თუმცა, ურთიერთობა არ შემიწყვეტია, როდესაც მარწმუნებდა, რომ ორი ვერსია აქვს, რა შემთხვევაში გაიმარჯვებს ბურჯანაძე. იქ მკვახედ ვუთხარი, რომ ორივე ვერსია შენთვის დამითმია მეთქი, მე მაგის მოსმენაზე დროს არ დავხარჯავ მეთქი. ასეთი ანალიტიკოსია და ასეთი ექსპერტია გია ხუხაშვილი. მორალთან დაკავშირებით კიდევ, სად წავიდა, როგორ წავიდა, ყველა მოიარა და ყველაფერი მოატყავა, თავში ჰქონდა ილუზია, რომ მე კი არ ვალაგებდი, ეგ ალაგებდა ყველაფერს, მოიქცა უღირსად და არ შემომიშვია და არც შემოვუშვებ, ეს მისი ბრალეულობა იყო. ნაცვლად იმისა, რომ დაელაგებინა და გაესწრორებინა. სადაც კი შეიძლებოდა დესტრუქცია, ყველგან მიდიოდა. დღევანდელი მაგის პოზიცია ერთი-ერთზე „ნაციონალურ მოძრაობის“ პოზიციაა. ახლა ხელფასს საიდან იღებს და ფულს იღებს თუ არა, ჩემი ინტერესი არ არის. იქ რომ დგას და მაგათ პოზიციას ამყარებს, ჩანს“, – განაცხადა ივანიშვილმა.
