ჯანდაცვის სამინისტროს სამედიცინო საქმიანობის სახელმწიფო რეგულირების სააგენტოს უფროსის გია თვალავაძის საქმეზე ბევრი ახალი გარემოება არსებობდა, რომელიც მიუთითებდა იმაზე, რომ პატიმრობის, როგორც აღკვეთის ღონისძიების ყველაზე მძიმე სახეობის გამოყენების საჭიროება აღარ არსებობდა, - განაცხადა ჟურნალისტებთან გია თვალავაძის ადვოკატმა, ტარიელ კაკაბაძემ.
როგორც ის განმარტავს, პენიტენციურ დაწესებულებაში თვალავაძის ჯანმრთელობის მდგომარეობა გაუარესდა, რის გამოც მისი გირაოს სანაცვლოდ გათავისუფლების მოთხოვნის დაყენების საფუძველი არსებობდა.
"წარმოვადგინეთ არაერთი დოკუმენტაცია, რომელიც ადასტურებდა პენიტენციურ დაწესებულებაში ყოფნის პერიოდში თვალავაძის ჯანმრთელობის მდგომარეობის დამძიმებას. იძულებული გახდნენ, ის ჩაფიძის კლინიკაში ორჯერ გადაეყვანათ. შესაბამისად, აღნიშნული გარემოება სხვა არაერთ დოკუმენტაციასთან ერთად, ადასტურებდა იმას, რომ მისი ჯანმრთელობის მდგომარეობა გაუარესდა. შესაბამისად, მას ამ საფუძვლით შეეცვალა აღკვეთის ღონისძიება, პატიმრობა გირაოთი.
რა თქმა უნდა, ამით საქმე არ დასრულებულა, წინ გველოდება წინასასამართლო სხდომა, არსებითი განხილვა და ჩვენ აუცილებლად დავასაბუთებთ იმას, რომ ბრალდებული გახლავთ ძალიან წესიერი, პატიოსანი ადამიანი", - აცხადებს კაკაბაძე.
დაცვის მხარე მის 10 000 ლარის ოდენობის გირაოს სანაცოდ გათავისუფლებას ითხოვდა, თუმცა, სასამართლომ თანხის ოდენობა თავად განსაზღვრა.
"მას აღკვეთის ღონისძიება გირაოს სახით 20 000 ლარის ოდენობით შეეფარდა. ჩვენ სასამართლოს შევთავაზეთ, რომ აღკვეთის ღინისძიება -გირაო 10 000 ლარის ოდენობით განსაზღვრულიყო. სასამართლომ ეს შუამდგომლობა ნაწილობრივ დააკმაყოფილა, აღკვეთის ღონისძიება შეცვალა, მაგრამ გირაოს ოდენობა 20 000 ლარით განსაზღვრა", - აცხადებს კაკაბაძე.
აღკვეთის ღონისძიების გირაოს სანაცვლოდ გათავისუფლებას ბრალდების მხარე არ ეთანხმებოდა, რადგან თვლიდნენ, რომ მკურნალობის კურსის ჩატარება პენიტენციურ დაწესებულებაშიც შეიძლებოდა.
