ფარული ჩანაწერებით დაუსრულებელი ომი პირდაპირ სისხლის სამართლის დანაშაულია - ამაზე რეაგირება უნდა მოხდეს და ეს უნდა დასრულდეს, - ამის შესახებ პარლამენტის იურიდიულ საკითხთა კომიტეტის თავმჯდომარე ეკა ბესელიამ განაცხადა.
მისი თქმით, ვიდრე არ ექნება პასუხი გავრცელებული ჩანაწერების ნამდვილობასა და კანონიერებაზე, ის შინაარსის შეფასებას არ გააკეთებს.
„აღარ ვაპირებ ფარული ჩანაწერების ომზე კომენტარები ვაკეთო. ყველა კარგად ხედავს, რომ წინასაარჩევნო კამპანიის დროს, როცა არჩევნებამდე რამდენიმე დღე დარჩა, ამ ყველაფერს ერთი მიზანი აქვს, რომ შეიქმნას დაძაბული პოლიტიკური გარემო და არასასურველი კლიმატი არჩევნების წინ. ამ ქვეყანაში არსებობს კანონი, რომელსაც პატივი უნდა ვცეთ - ყველაფერი გამოძიებული, გამოქვეყნებული და გამაგრებული უნდა იყოს კანონის მიხედვით“, - განაცხადა ბესელიამ.
