ამ წუთებში, თბილისის საქალაქო სასამართლოში თემქაზე 20 წლის ანა ნაცვლიშვილის მკვლელობაში ბრალდებულ ლადო გრიგალაშვილის დედა, ეკატერინე კირვალიძე აძლევს ჩვენებას.
როგორც ის განმარტავს, მოკლულსა და მის შვილს კარგი ურთიერთობა ჰქონდათ.
"ძალიან კარგი ურთიერთობა ჰქონდათ. დასასვენებლად ერთად დადიოდნენ, ყოველი შაბათ-კვირა ერთად იყვნენ, არაჩვეულებრივი ურთიერთობა ჰქონდათ, მთელმა სანათესაომ იცოდა რომ ანა ჩვენი სარძლო იყო.
როგორც შეყვარებული არაფერს აკლებდა, ხელის გულზე ატარებდა. სულ გეგმებს ვაწყობდით მე და ჩემი შვილი, ცოლად მოყვანას აპირებდა. ყველაფერში ხელს ვუწყობდი ჩემს შვილს, რომ ერთად ყოფილიყვნენ, ანა მიყვარდა და პატივს ვცემდი", - აცხადებს კირვალიძე.
ავტოფარეხი, საიდანაც სამართალდამცავებმა გრიგალაშვილის საწინააღმდეგო მტკიცებულებები ამოიღეს, როგორც კირვალიძე აცხადებს, მათი საძინებლის ქვეშაა და ის გამთენიისას ვინმეს რომ გაეღო, აუცილებლად გაიგებდა, რადგან ფეხის ძლიერი მირტყმით შეიძლებოდა ფარეხის კარის გაღება.
კირვალიძე ამ წუთებში, მათ სახლში ჩატარებულ ჩხრეკასა და ნივთების ამოღებაზე საუბრობს.
როგორც ის აცხადებს, სახლიდან წაღებულ სამოსზე, კერძოდ კი, ქურთუკზე სისხლის ლაქები არ ყოფილა.
"იმ ქურთუკს არაფერი ჰქონდა. შემდეგ როგორც თქვეს, კაპიშონზე და ჯიბეზე იყო სისხლის წვეთები", - აცხადებს კირვალიძე.
20 წლის ანა ნაცვლიშვილის მკვლელობის საქმეზე მოკლულის შეყვარებული, ლადო გრიგალაშვილი დააკავეს, ის ჩადენილ დანაშაულს არ აღიარებს.
