ყველაზე ძალიან ჩემი სახლი და ბავშვები მენატრებოდა, – ამის შესახებ რუსი ოკუპანტების მიერ დაკავებულმა მაია ოთინაშვილმა საზოგადოებრივ მაუწყებელს გათავისუფლების შემდეგ განუცხადა.
მისი თქმით, რუსულ ბაზაზე გადაყვანის დროს მას თვალები ახვეული ჰქონდა.
„რუსულ ბაზაზე ვიყავი ერთი დღე, დილიდან საღამომდე. აქედან დაკავების დროს ძალის გამოყენებით გადამიყვანეს. კარგად არ მესმოდა, რუსულად რას ლაპარაკობდნენ. მოჰქონდათ რაღაც ფურცლები და ხელს მაწერინებდნენ.
ბაზიდან ცხინვალის იზოლატორში გადამიყვანეს, ოთხი დღე იქ ვიყავი. მეხუთე დღეს სასამართლო გვქონდა. ერთთვიანი შეგვიფარდეს და მას შემდეგ ციხეში ვიყავი.
ორი სასამართლო პროცესი იყო. ერთწლიანი პირობითი მომისაჯეს. განმიმარტეს, რომ ექვსი თვე არ უნდა ჩავიდინო ეს დანაშაული, ისინი რასაც ეძახიან დანაშაულს. თუ მერე კიდე დავიჭერთ, მერე გაგასამართლებთო. ყველაზე ძალიან ჩემი სახლი და ბავშვები მენატრებოდა“, – განაცხადა მაია ოთინაშვილმა.
ცნობისთვის, ოკუპირებული ახალგორის ე.წ. რაიონულმა სასამართლომ მაია ოთინაშვილი პატიმრობიდან გაათავისუფლა.
