ვიღაცას ძალიან უნდა, ბურჭულაძე ქვეყნიდან წავიდეს. მე არ ვიტყვი ვის, მაგრამ ყველამ კარგად იცის, ვის უნდა ბურჭულაძე ქვეყნიდან წავიდეს, ვის უშლის მისი ავტორიტეტი, ვისთვისაა ცოტა ადგილი. თუ ვის, ამას არ ვიტყვი, რადგან ის თავისი თანხით მე გამასამართლებს, - ეს კომენტარი 5 საათიანი გამოკითხვის შემდეგ სასამართლოს სხდომათა დარბაზიდან გამოსულმა პაატა ბურჭულაძის მეუღლემ, ანგელა ვასილენკომ გააკეთა.
როგორც ის განმარტავს, მასთან პროკურატურის წარმომადგენლებს საკმაოდ ბევრი კითხვა ჰქონდათ, რასაც ამომწურავად გასცა პასუხი.
"ძალიან ბევრი კითხვა იყო 4 საათის განმავლობაში. კითხვები შეეხებოდა ფონდს, მე მათ ამომწურავი ინფორმაცია მივაწოდე და იმედი მაქვს, მათ მეტი კითხვები აღარ ექნებათ.
ამ ფონდში 14 წელი ვმუშაობდი, მაგრამ 2 წელი ვიღებდი სამუშაოს გასამრჯელოს. მე დამხმარე კონსულტანტი ვიყავი, ვმუშაობდი ყველაფერზე, რაც სამხატვრო ნაწილს ეხებოდა, მოლაპარაკებებზე, სტუმრებთან შეხვედრებზე...
14 წელი მუშაობს ფონდი, მე არ ვიცი ზუსტი ციფრები ბუღალტერიიდან, მაგრამ 14 წელზე რომ გაყოთ მთელი წლის ფრენები, იანგარიშეთ, ჩვენ დავფრინავდით ორნი, რამდენი იქნება ფული? ჩვენ არ ვიყენებდით სახელმწიფო თანხას, ფული იყო სპონსორების. ჩვენ ვაკეთებდით შესანიშნავ პროექტებს", - აცხადებს ვასილენკო.
მისივე განმარტებით, ბურჭულაძის სახელსა და ავტორიტეტს მიზანმიმართულად ებრძვიან. თუმცა, ვასილენკო არ აკონკრეტებს, ვის გულისხმობს.
"ეს ადამიანები, რომლებიც დაკავებული არიან შავი პიარით, ანადგურებენ არამხოლოდ, ბურჭულაძის სახელს, არამედ ისინი ანადგურებენ ფონდის სახელს, ქველმოქმედების სახელს...
ვიღაცას ძალიან უნდა, ბურჭულაძე ქვეყნიდან წავიდეს. მე არ ვიტყვი ვის, მაგრამ ყველამ კარგად იცის ვის უნდა ბურჭულაძე ქვეყნიდან წავიდეს, ვის უშლის, ვისთვისაა ცოტა ადგილი, ვის უშლის მისი ავტორიტეტი. არ ვიტყვი, რადგან ის თავისი თანხით მე გამასამართლებს", - აღნიშნა ბურჭულაძის მეუღლემ.
მისივე თქმით, პროკურორმა ჟურნალისტებს არასწორი ინფორმაცია მიაწოდა იმის თაობაზე, თითქოს, ის გამოძიებას მიემალა.
"პროკურორმა ამირან გულუაშვილმა ჟურნალისტებს გითხრათ, რომ მე გავიქეცი, რომ 7 თვე თვე მიძახებდნენ პროკურატურაში, ეს სიცრუეა! მე არავის გამოვუძახებივარ! პროკურატურის წარმომადგენელი ლომთაძე კი ნამდვილად იყო ჩემთან სახლში და მას ნამდვილად მოვუწერე ხელი, რომ 8 რიცხვში სასამართლოში გამოვცხადდებოდი, რადგან არ მინდოდა პროკურატურისთვის მიმეცა ჩვენება. 6 რიცხვში მქონდა ფრენა, პროკურატურამ კი ჟურნალისტებს მოგცათ ინფორმაცია, რომ მე სასამართლოს, პროკურატურას გავურბოდი.ეს ყველაფერი შავი პიარის ნაწილია", - დასძენს ვასილენკო.
