მოწოდება ძალადობისკენ, აგრესიისკენ და შევიწროებისკენ არავის არ ეპატიება, - ამის შესახებ პარლამენტის ადამიანის უფლებათა დაცვის კომიტეტის თავმჯდომარე სოფო კილაძემ განაცხადა.
მისი თქმით, თუ ვინმეს პრეტენზია აქვს, რომ ქვეყანაში ადამიანის უფლებებს იცავს, ყველას მისამართით უნდა დაიცვას და გარჩევა არ უნდა მოხდეს.
„არ მგონია, რომ ირაკლი კობახიძის განცხადებაში ფაშისტური რაიმე ყოფილიყო, პირიქით, მან არასამთავრობო სექტორს მოუწოდა, რომ ფაშისტური განცხადებებით დაინტერესდნენ. შერჩევითი საკითხებია, რაზეც აჟიოტაჟი ტყდება ხოლმე და რთულ შემთხვევებზე არანაირი განცხადება არ კეთდება, რაც კითხვებს აჩენს.
ადამიანის უფლებები ყველაზე მოქმედებს და ყველას თანაბრად უნდა მოვექცეთ. მნიშვნელობა არ აქვს, ვინ იტყვის. მოწოდება ძალადობისკენ, აგრესიისკენ და შევიწროებისკენ არავის არ ეპატიება. თუ ვინმეს პრეტენზია აქვს, რომ ადამიანის უფლებების სადარაჯოზე დგას, რა მნიშვნელობა აქვს, დასაგმობ განცხადებას ვინ გააკეთებს, პოლიტიკოსი თუ მედიის წარმომადგენელი? თუ ვინმეს პრეტენზია აქვს, რომ ქვეყანაში ადამიანის უფლებებს იცავს, ყველას მისამართით უნდა დაიცვას და გარჩევა არ უნდა მოხდეს”, – განაცხადა კილაძემ.
მისივე თქმით, დემოკრატიულ საზოგადოებაში არასამთავრობო სექტორის როლი მნიშვნელოვანია, თუმცა დემოკრატიისთვის საზიანოა, როცა არასამთავრობო სექტორის ზოგიერთი წარმომადგენელი თავის პოზიციას ბოროტად იყენებს.
შეგახსენებთ, ტელეკომპანია "რუსთავი 2"-ის გენერალურმა დირექტორმა ნიკა გვარამიამ სოციალურ ქსელში დაწერა, რომ ყველა, ვინც სალომე ზურაბიშვილს ან აფინანსებს, ან კამპანიაში სხვაგვარად ეხმარება, ყველა პოლიტიკოსი, რომელიც დაყვება და მხარს უჭერს, უკიდურესად უნდა შევავიწროვოთ.
