"ომეგა ჯგუფის" და ტელეკომპანია "იბერიას საქმესთან დაკავშირებით, ჟურნალისტის მიერ დასმულ შეკითხვას, აპირებს თუ არა ლონდონში ჩასვლას, შინაგან საქმეთა მინისტრმა გიორგი გახარიამ უპასუხა, რომ იქ დიდი ხანია არ ყოფილა და აუცილებლად ჩავა.
„დიდი ხანია ლონდონში არ ვყოფილვარ, მართლა, დაახლოებით 6 წელია და დიდი სიამოვნებით ჩავალ ლონდონში. როდესაც არსებობს ეჭვები, განსაკუთრებით თანამდებობის პირებთან დაკავშირებით, რა თქმა უნდა, შესაბამისმა უწყებებმა უნდა იმოქმედონ კანონის სრული დაცვით და რაც შეიძლება სწრაფად, იმისთვის, რომ ამ კითხვებს, განსაკუთრებით იმ შემთხვევაში როდესაც ეს კითხვები გაურკვეველია, გაეცეს შესაბამისი პასუხი“. - განაცხადა გიორგი გახარიამ.
საუბარია "ომეგა ჯგუფის" სარჩელზე, რომლითაც კომპანიამ ლონდონის სასამართლოს მიმართა. როგორც კომპანიის ბრიტანელმა ადვოკატმა განაცხადა, ლონდონის სასამართლოს წინაშე თავის მართლება, ივანიშვილთან ერთად, გიორგი გახარიას, დიმიტრი ქუმსიშვილს, ნოდარ ხადურს, ლევან ყიფიანსა და ანზორ ჩუბინიძეს მოუწევთ.
საქმე ეხება აუდიო ჩანაწერებს, საიდანაც ირკვევა, რომ "ომეგა ჯგუფს" წილების გადანაწილებას და თანხებს სთხოვდნენ. ჩანაწერში ყოფილი და მოქმედი მაღალჩინოსნები ფუგურირებენ.
აუდიოჩანაწერის მიხედვით, თითოეული გაყიდული კოლოფი სიგარეტიდან 2,5 თეთრი, "ქართულ ოცნებაში" მიდიოდა.
გავრცელებულ ჩანაწერებზე გამოძიება დაწყებულია, ჯერჯერობით მისი ავთენტურობა დადასტურებული არ არის.
