სოფიო ქაცარავა ურუგვაის სენატში საქართველოს პარლამენტთან მეგობრობის ჯგუფის ხელმძღვანელს მონიკა ქსავიერს შეხვდა, რომელიც თბილისში ოფიციალური ვიზიტით იმყოფება. შეხვედრაზე განიხილეს ორმხრივი საპარლამენტო ურთიერთობების განვითარების დინამიკა, სამომავლო დღის წესრიგი და საერთო ინტერესები.
პოლიტიკურ საკითხებთან ერთად აქცენტი გაკეთდა ეკონომიკური თანამშრომლობის პერსპექტივებზე და საერთო მიზნებზე ამ სფეროში.
„ჩვენთვის ერთ-ერთი მნიშვნელოვანი საგარეო პოლიტიკურ მიმართულებაა ლათინური ამერიკის ქვეყნებთან ურთიერთობების გაღრმავება და საპარლამენტო კავშირების გაძლიერება. ურუგვაი საქართველოს სუვერენიტეტისა და ტერიტორიული მთლიანობის მხარდამჭერს წარმოადგენს. იკვეთება ორ ქვეყანას შორის თანამშრომლობის არაერთი სფერო. სენატორის ვიზიტი მოგვცემს შესაძლებლობას, რომ განვიხლოთ ორი ქვეყნის თანამშრომლობის დღის წესრიგში არსებული მნიშვნელოვანი საკითხები", - განაცხადა სოფიო ქაცარავამ.
საგარეო ურთიერთობათა კომიტეტის თავმჯდომარემ შეხვედრაზე ყურადღება გაამახვილა ოკუპირებულ ტერიტორიებზე არსებულ ვითარებასა და ამ მიმართულებით პარტნიორი ქვეყნების მხარდაჭერის მნიშვნელობაზე.
