რუსულ პროპაგანდასთან დაპირისპირება ხელისუფლებისა და საზოგადოების ერთიანი ამოცანაა, – ამის შესახებ საპარლამენტო უმრავლესობის ლიდერმა, არჩილ თალაკვაძემ თბილისში მიმდინარე მედიაფორუმთან დაკავშირებით განაცხადა.
მისი თქმით, საჭიროა თითოეული ჩვენგანის, როგორც მოქალაქეების პრინციპული პოზიცია.
„ამ ყველაფერს სათანადო რეაგირება და შეფასება უკვე მოჰყვა, რაც ჩვენთვის და საზოგადოებისთვის შეუმჩნეველი არ დარჩენილა. სახელმწიფოს რეაქცია ნახეთ, როცა ქვეყანაში ის ჟურნალისტები არ შემოუშვეს, რომელთაც „ოკუპირებული ტერიტორიების შესახებ“ კანონი აქვთ დარღვეული. თუ გაინტერესებთ, სახელმწიფოს რეაქცია რა არის, არის პრაგმატული საგარეო პოლიტიკა. ჩვენი ქვეყანა ანთებული გულით უნდა გვიყვარდეს, მაგრამ ცივი გონებით უნდა ვიმოქმედოთ. ეს ის პოლიტიკაა, რომელსაც ვატარებთ. ეს არის თანმიმდევრული პოლიტიკა, რომელმაც ქვეყანას უსაფრთხოება და სტაბილურობა მოუტანა. ეს მიღწევები კიდევ უფრო გამყარდება“, – განაცხადა თალაკვაძემ.
ცნობისთვის, საქართველოში მედიაკონფერენცია ტარდება, რომელიც რუსეთის პრეზიდენტის, ვლადიმერ პუტინის ფონდის დაფინანსებით იმართება და რომელსაც ესწრებიან ჟურნალისტები, რომლებიც ოკუპაციას არ აღიარებენ.
