რუსეთის ხელისუფლების ფულით არის დაფინანსებული ყველა ფონდი და მით უმეტეს, ასეთ პოლიტიკურად ანგაჟირებულ ჟურნალისტებს აფინანსებს, მაგრამ არ მგონია, მათ რამე რესურსი აქვთ, ჩვენს საზოგადოებას ტვინი გამოურეცხონ, – ამის შესახებ პარლამენტის ვიცესპიკერმა გია ვოლსკიმ რუსეთის წარმომადგენლების მონაწილეობით თბილისში მიმდინარე მედიაფორუმთან დაკავშირებით განაცხადა.
მისი თქმით, მისთვის აღმოჩენა არ არის, რომ რუსი ჟურნალისტები ან პოლიტიკოსები ფიქრობენ ისე, როგორც ჩვენ არ ვფიქრობთ.
„ერთადერთი, ვისაც პოლიტიკური სარგებელი შეიძლება ჰქონდეს ამ ჩამოსვლიდან, სკანდალური კითხვებიდან და პასუხებიდან არის „ნაციონალური მოძრაობა“. თუმცა არ მგონია, მათაც გაიმარჯვონ ამ თემის წამოწევაში. თბილისში ჩამოსვლის გარეშეც ვიცით მათი პოზიცია და მათი საუბარი არაფერს ცვლის საქართველოს მთავრობის დამოკიდებულებაში, მთავრობის საგარეო პოლიტიკაში ან საზოგადოების ცნობიერებაში, რომ საქართველოში მოხდა რუსეთის აგრესია და ოკუპაცია“, – განაცხადა გია ვოლსკიმ.
ცნობისთვის, საქართველოში მედიაკონფერენცია ტარდება, რომელიც რუსეთის პრეზიდენტის, ვლადიმერ პუტინის ფონდის დაფინანსებით იმართება და რომელსაც ესწრებიან ჟურნალისტები, რომლებიც ოკუპაციას არ აღიარებენ.
