ჩვენთვის მნიშვნელოვანია, რომ კომისიამ მისი მანდატის ფარგლებში შეასრულოს დაკისრებული ვალდებულება. კომისია არ უნდა გაცდეს იმ ფარგლებს, რომელიც დაარღვევს ხელისუფლების დანაწილების პრინციპს და არ უნდა შექმნას ყალბი მოლოდინი, ეს იქნება მეტი ტრავმა და კიდევ მეტი ზიანის მიყენება, როგორც დაზარალებულებისთვის, ასევე საზოგადოებისთვის. ის რეკომენდაციები, რომელიც მოამზადა „ევროპულმა საქართველომ“, რომელიც ჩვენ გამოგვიგზავნა, ეს არის პირდაპირი და კლასიკური სამწუხარო მაგალითი, როგორ შეიძლება გადაამეტო საკუთარ უფლებამოსილებას, - განაცხადა ჟურნალისტებთან ხორავას ქუჩაზე მომხდარი მკვლელობის საქმეზე შექმნილი პარლამენტის დროებითი საგამოძიებო კომისიის წევრმა, ეკა ბესელიამ.
როგორც ის განმარტავს, ოპონენტები ცდილობენ ისეთი სურათი შექმნან, თითქოს, გამოძიებამ, ან სასამართლომ ვერ აღმოაჩინა მკვლელი.
"მესმის რომ დიდია ცდუნება, როგორმე ჩვენმა ოპონენტებმა შექმნან ილუზია, რომ მათ თითქოს, აღმოაჩინეს ისეთი რამ, რაც ვერ აღმოაჩინა მკვლელის სახით გამოძიებამ, ან სასამართლომ და უნდათ, ასეთი სურათი შეიქმნას, მაგრამ პირდაპირ გეუბნებით, რომ ადამიანურად და მორალურად, სრულიად დაუშვებელია ვარაუდებით, ეჭვებით და სურვილით დააბრალო ვინმეს მკვლელობის ჩადენა. ამის გარდა ეს არის, კონსტიტუციური პრინციპის დარღვევაა. იცით რომ მიმდინარეობს სააპელაციო სასამართლოში განხილვა, ასევ პირველ ინსტანციაში სხვა პირების მიმართ საქმის განხილვა, მიმდინარეობს გამოძიება, ანუ, კომისიის გარდა სამი ეტაპი მიმდინარეობს.
ძალიან მნიშვნელოვანია, რომ კომისიამ დაუტოვოს მართლმსაჯულებას თავისი ფუნქცია და ჩვენ ჩვენი ფუნქცია შევასრულოთ", - აცხადებს ბესელია.
მისივე განმარტებით, საქმის გამოძიების პროცესში ხარვეზები აღმოაჩინეს, თუმცა, ამას საერთო სურათი არ შეუცვლია.
"რა თქმა უნდა, ჩვენც ვხედავთ ამ საქმის შესწავლის პროცესში გარკვეულ ხარვეზებს და არის გარკვეული პრობლემები, რომელიც უფრო ფართო ჭრილშია დასანახი.ეს ეხება იმას, რომ გარკვეული საგამოძიებო მოქმედებები შეიძლებოდა ჩატარებულიყო უფრო ადრე, ან თანმიმდევრულად და ა.შ. ეს არის საკამათო საკითხი, რადგან კონკრეტულად გაწერილი პროცედურა არ არსებობს კანონში, გამოძიება წყვეტს როდის რას ატარებს, მაგრამ ისეთი ტიპის ქმედება, რომელიც საერთოდ შეცვლიდა სურათს და მკვლელობის მონაწილე სხვა პირებს დაასახელებდა, ასეთი გარემოება კომისიას არ მოუპოვებია და ის, რაზეც საუბრობენ ჩვენი ოპონენტები ბოლო დღეების განმავლობაში, ეს იქნება ე.წ. ტარი თუ ჯიბეში ვიღაცამ ხელი ჩაიყო, ამ სტანდარტით ერთია, რომ არ შეიძლება პირის დამნაშავეობაზე საუბარი და ეს არ არი ის სტანდარტი, რომლითაც მართლმსაჯულების ორგანო უნდა ხელმძღვანელობდეს. ეს შეფასებები არის მართლმსაჯულების საგანი.
მ.კ.-სთან დაკავშირებით კიდევ ერთხელ მინდა ვთქვა, არცერთი პირი, რომელიც საქმეში მონაწილეა, ან ფიგურირებს, არცერთი პირის მიმართ კვალიფიკაციის განსაზღვრა, ვის რა მუხლით უნდა წარედგინოს ბრალი, ეს არ არის პარლამენტის საგამოძიებო კომისიის საქმე არ არის. ყველა ეჭვი, გარემოება, რაც კომისიამ მოიპოვა, საგამოძიებო ორგანოს გადავცემთ და გარკვეული რეკომენდაციები გვექნება, რომ ერთობლიობაში შეაფასონ და საბოლოოდ მართლმსაჯულების ორგანომ განსაზღვროს ვის რა კვალიფიკაცია შეიძლება შეეფარდოს, ან ვისი სისხლის სამართლის პასუხისმგებლობა უნდა დადგეს. ეს არის მართლმსაჯულების პრეროგატივა. თუ ეს არ გავყავით და მკვეთრად არ იქნება დაცული ზღვარი, სად უნდა გაჩერდეს კომისია და სად იწყება მართლმსაჯულების და საგამოძიებო ორგანოების ფუნქცია, ყველაფერი აირ-დაირევა და ამ ქვეყანაში ასე სამართლიანობა ვერასდროს აღდგება", - განაცხადა ბესელიამ.
