საქართველოს პრეზიდენტის მიხეილ სააკაშვილის განცხადებით, "რუსეთს ისევე აღელვებს ოსები, როგორც ავსტრალიელი აბორიგენები".
"მას მხოლოდ თავისი ამბიციები, იმპერია, თავის სიდიადეზე თავისი წარმოდგენები აღელვებს, რომლებიც ეფუძვნება იმას, რამდენ ქართველ და ოს ოჯახს გაამწარებს, რამდენ სოფელს გადაუვლის ტანკით და ბეტეერით და მსოფლიოში რამდენ ქვეყანას ეშინია მისი", - განაცხადა სააკაშვილმა დღეს გორის რაიონის სოფელ საქაშეთში დევნილებისთვის ახალი სახლების გადაცემის ცერემონიაზე.
გორის რაიონის სოფელ საქაშეთში 2008 წლის აგვისტოს ომის შედეგად დევნილი 100 ოჯახი ჩასახლდება. სახლები თურქეთის თანამშრომლობისა და აღორძინების ადმინისტრაციის დაფინანსებით აშენდა. ახალმოსახლეები ბოლო დრომდე საბავშვო ბაღებსა და სხვადასხვა ობიექტებზე იყვნენ გადანაწილებული და არ გააჩნდათ საკუთარი სახლი. სპეცილურად ცერემონიალზე დასასწრებად საქართველოს ოფიციალური ვიზიტით თურქეთის რესპუბლიკის სახელმწიფო მინისტრის, ფარუქ ჩელიქის ხელმძღვანელობით თურქეთის რესპუბლიკის დელეგაცია ეწვია.
