„ხორავას ქუჩის“ საქმის საგამოძიებო კომისიის სხდომაზე სამხარაულის ექსპერტიზის ბიუროს წარმომადგენლების მოსმენა დახურული ფორმატით მიმდინარეობს.
ექსპერტების გამოკითხვა თავდაპირველად ღია რეჟიმში დაიწყო, თუმცა, იმის გამო, რომ მათ გარდაცვლილთა ჭრილობებთან დაკავშირებულ დეტალებზე და სხვა საკითხებზე უნდა ესაუბრათ, სხდომა დაიხურა.
სხდომის დაწყებამდე კი “ქართული ოცნების“ დეპუტატმა, მამუკა მდინარაძემ, ჟურნალისტებთან განაცხადა, რომ „ხორავას ქუჩის საქმეზე ექსპერტებთან არის ძალიან ბევრი კითხვა, არის ბევრი პროფესიული დეტალი, რაც დამატებით განმარტებებს საჭიროებს“.
“მაგალითად, გამორიცხვა ჭრილობებიდან - რომელი დანით რომელი ჭრილობა შეიძლება გამოირიცხოს, რომელ დანას შეიძლება არ მიეყენებინა კონკრეტული დაზიანება, შეეძლო თუ არა კონკრეტულ დანას კონკრეტული დაზიანების და ჭრილობის მიყენება და ასე შემდეგ. გამოკითხვის პროცესში ბევრი რამ გაირკვევა და კარგი იქნება თუ გამორიცხვის გზით კონკრეტულ კითხვებს პასუხი გაეცემა. თქვენ გახსოვთ, რომ ჩვენ უკვე დავსვით კითხვა, თუ რატომ მოხდა ისე, რომ ერთ-ერთი ბრალდებულის დანაზე გარდაცვლილის დნმ პროფილი არ აღმოჩნდა და შემდეგ აღმოჩნდა ხელსახოცზე, რომელშიც ეს დანა იყო გახვეული. ამაზე გარკვეული პასუხები გამომძიებლებისგან და პროკურორებისგან მივიღეთ, თუმცა კიდევ უფრო საინტერესოა ექსპერტის პოზიცია ამასთან დაკავშირებით,“ - განაცხადა მდინარაძემ.
