ეს არის სრული მოულონდელობა და ბიზნესისთვის დამანგრეველი ნაბიჯი, - ასე შეაფასა „ჯი-ეიჩ-ენთან“ სასტუმრო „ლეოგრანდის“ იურისტმა კახა წერეთელმა საგანგებო სიტუაციების მართვის სამსახურის მიერ გავრცელებული ინფორმაცია, რომლის მიხედვითაც,  უწყების მიერ გაცემული 43 რეკომენდაციიდან უმეტესობა სასტუმროს არ შეუსრულებია.  

„ეს ინფორმაცია მოულოდენლი იყო, რადგან ბოლო პერიოდში არცერთი გაფრთხილება არ შემოსულა. წერილობით გავაფრთხილეთო, თუმცა, სასტუმროს ეს გაფრთხილებები არ ჩაბარებია.

თან, საქმიანობის შეჩერება ეხება როგორც სასტუმროს, ასევე კაზინოს. საერთოდ, კაზინო რა შუაშია, ვერ ვაკავშირებთ, მოკლედ, ბევრი კითხვაა“, - აცხადებს წერეთელი.

კითხვაზე, დამონტაჟდა თუ არა სასტუმროში კვამლსაწინააღმდეგო დაცვის სისტემები, ადვოკატი პასუხობს, რომ ამას „ლეოგრანდში“ მოწვეულ ჟურნალისტებს ანახებს.

„მოვიწვევთ ჟურნალისტებს და განახებთ, თუ რა გაკეთდა. ის, რომ არცერთი რეკომენტაცია შესრულებული არ არის, სიმართლეს არ შეესაბამება. საგანგებო სიტუაციების მართვის სამსახურმა დაადგინა კონკრეტული გრაფიკი სამუშაოების შესასრულებლად, რაც მიმდინარე წლის ბოლომდე პერიოდს მოიცავს. ამ სამუშაოების შესრულება მათთან კოორდინაციაში ხდებოდა. პუნქტების უმეტესობა შესრულებულია იმ ვადებში, რა ვადებშიც უნდა შესრულებულიყო და ამ ყველაფერს განახებთ. საგანგებო სიტუაციების მართვის სამსახურმა თვითონ შეიტანა სასამართლოში მოთხოვანა საქმიანობის შეჩერებასთან დაკავშირებით და ჩვენ მივყვებით ამ პროცედურებს, საკუთარ სიმართლეს დავამტკიცებთ“, - აცხადებს იურისტი.

შეგახსენებთ, რომ საგანგებო სიტუაციების მართვის სამსახური სასტუმრო და სამორინე “ველმონდის” (ყოფილი “ლეო გრანდი”) შენობის ექსპლუატაციის შეჩერებას მოითხოვს. 

​„საგანგებო სიტუაციების მართვის სამსახურის სპეციალისტებმა, 2018 წელს სასტუმროსა და სამორინეში სახანძრო უსაფრთხოების მიზნით, სამჯერ განახორციელეს (დეტალური, საკონტროლო და მიზნობრივი) სახანძრო-ტექნიკური შემოწმება. გაიცა 43 რეკომენდაცია, რომელთა უმეტესობა არ შესრულებულა.

სპეციალისტების დასკვნით, შენობაში არ არის დამონტაჟებული კვამლსაწინააღმდეგო დაცვის სისტემები, რაც ხანძრის შემთხვევაში, შენობაში მყოფ ადამიანებს არ უტოვებს უსაფრთხო ადგილას ევაკუაციისა და გადარჩენის შესაძლებლობას. ​გასული წლის ხანძრის შეფასების შედეგებმა აჩვენა, რომ ადამიანთა დაღუპვის ძირითადი მიზეზი, სწორედ კვამლსაწინააღმდეგო სისტემების არარსებობა გახდა.

​კვლავ ვერ ხერხდება სამშენებლო კონსტრუქციების ცეცხლმედეგობისადმი დადგენილი ნორმების რეალიზება, რაც ხანძრის შემთხვევაში ცეცხლის სწრაფად გავრცელების საშიშროებას ქმნის. შენობაში არ შექმნილა საევაკუაციო გზებისთვის დამატებითი ინფრასტრუქტურა და გაურკვეველია, როდის დამონტაჟდება სართულების დამაკავშირებელი გარე საევაკუაციო კიბე.

ეს დარღვევების მცირედი ჩამონათვალია, რომლის გამოსწორებისთვის სასტუმროს ადმინისტრაციას არაერთხელ მიეცა გონივრული ვადა.

საგანგებო სიტუაციების მართვის სამსახური, სპეციალისტების დასკვნის საფუძველზე, სახანძრო უსაფრთხოების მოთხოვნების დაკმაყოფილებამდე, დაუშვებლად მიიჩნევდა სასტუმრო და სამორინე "ველმონდის" შენობის ექსპლუატაციაში შესვლას. თუმცა, სასტუმროს ადმინისტრაციამ, მიმდინარე წლის 17 მაისს, სახელმწიფო სახანძრო ზედამხედველობის სამსახურის მოთხოვნისა და 2017 წლის 24 ნოემბერს სასტუმროში მომხდარი ხანძრის შედეგების სრული იგნორირებით, განაახლა შენობის ექსპლუატაცია.

​სასტუმროს ადმინისტრაციამ სამჯერ შემოწმებისა და დაჯარიმების მიუხედავად, დღემდე ვერ წარმოადგინა კონკრეტული გეგმა, როგორ აპირებს სახანძრო უსაფრთხოების უზრუნველყოფას შენობაში.

სასტუმროსა და სამორინეში სახანძრო უსაფრთხოების კუთხით არსებული საგანგაშო მდგომარეობა, უმნიშვნელო ხანძრის შემთხვევაშიც კი, სერიოზულ საფრთხეს შეუქმნის ადამიანების სიცოცხლეს.

საგანგებო სიტუაციების მართვის სამსახურმა მიმართა სასამართლოს, რათა განჩინების საფუძველზე, სასტუმრო და სამორინე "ველმონდის" შენობას შეუჩერდეს ექსპლუატაცია, რათა დაცული იყოს მოქალაქეების უსაფრთხოება“, - ნათქვამია საგანგებო სიტუაციების მართვის სამსახურის განცხადებაში.