საპარლამენტო უმრავლესობის წევრი, დავით ჭიჭინაძე, აცხადებს, რომ მთავრობაზე საპარლამენტო კონტროლის გაძლიერებისა და პარლამენტის ქუთაისში დარჩენის შემთხვევაში, მთავრობა ფუნქციონირებას ვეღარ შეძლებს. ამის შესახებ განცხადება დავით ჭიჭინაძემ დღეს პარლამენტში ჟურნალისტებთან საუბრისას გააკეთა და დასძინა, რომ ის მომხრეა, პარლამენტი ქუთაისიდან თბილისში სრულად დაბრუნდეს, რადგან ასე პარლამენტის და მთავრობის საქმიანობაც უფრო ეფექტიანი იქნება.
„თუ საპარლამენტო კონტროლი ძლიერდება, მინისტრები სულ ქუთაისში უნდა ვატაროთ? თუ ჩვენ და მინისტრები ქუთაისში ვიქნებით, მაშინ სამინისტროებში არავინ აღარ იქნება. დრო ყველაფერს განსაზღვრავს, ძალიან ბევრი დრო მოგზაურობაში იკარგება. ქუთაისში რეგისტრაციის შემდეგ ისეთი საკითხებია, სადაც რამდენიმე დეპუტატი სამუშაო კალაპოტიდან ამოვარდნილია,“ – განაცხადა ჭიჭინაძემ.
