საქმის მასალებს, მოწმეთა ჩვენებებს რომ გავეცანით, დარწმუნებული ვართ, რომ მკვლელი ბრალდებულია, - განაცხადა სასამართლო პროცესზე თემქაზე მოკლული ანა ნაცვლიშვილის დედამ, თეონა გოგლიძემ.
მას მკვლელობაში ბრალდებულის ქმედებები ეჭვებს უჩენს და არწმუნებს, რომ დანაშაული სწორედ მისი ჩადენილია.
"ჩემი შვილი ღამით დარეკილზე არასდროს გარეთ არ გავიდოდა, ამას მოწმეც ადასტურებს. ბრალდებულმა დაურეკა, გარეთ გაიყვანა და სისრულეში მოიყვანა თავისი ჩანაფიქრი. რატომ კითხულობდა დილის 5 საათზე ანა სად იყო? რატომ ეძებდა იმ ღამეს ასეთი ინტენსივობით ანას?", - განაცხადა გოგლიძემ.
მან სასამართლოზე დეტალურად გაიხსენა მკვლელობის დღეს თუ როგორ მივიდა მათ სახლში ბრალდებული ლადო გრიგალაშვილი და როგორ ეძებდა მათთან ერთად ანას.
"დილით სახლის კარზე ზარმა გამაღვიძა. ჩემი მეორე ქალიშვილი იდგა კართან, ლადოა მოსული, ეძებს და ანა სახლში არ არისო, მითხრა. ანას ვემესიჯებოდი, უცებ აღარ მიპასუხა და მოვედიო, თქვა ბრალდებულმა.
ჩემი მეუღლე გავაღვიძე, ანა არ არის სახლში-მეთქი. თან ვუთხარი რომ ბრალდებულიც ელოდებოდა.
ლადო გრიგალაშვილმა ჩემი ქმარი ანას მეგობართან სხვა გზით წაიყვანა.
ამასობაში ანასთან ინტენსიურად ვრეკავდი, ერთ-ერთ ზარზე კაცმა მიპასუხა, პოლიციელი ვარ, თქვენი შვილი უგონო მდგომარეობაშია სავადმყოფოში გადაყვანილიო.
ჩემს მეუღლეს დავურეკე რომ ბავშვი გამოჩნდა, ბრალდებულსაც დავურეკე, მეგონა რომ ნერვიულობდა. არ ინერვიულო, ანა გამოჩნდა-მეთქი ვუთხარი. საავადმყოფოში გვითხრეს რომ დამძიმდა და მერე გვითხრეს ის, რაც იყო", - განაცხადა გოგლიძემ.
