რუსეთის პრეზიდენტის დიმიტრი მედვედევის განცხადებით, საქართველოსთან კონფლიქტმა კიდევ ერთხელ აჩვენა, რომ ევროპული უსაფრთხოება არამყარია.
რუსეთ-საქართველოს ომზე მედვედევმა ამჟერად გერმანულ გამოცემა "შპიგელთან" ისაუბრა.
"საქართველოსთან კონფლიქტმა კიდევ ერთხელ აჩვენა, რომ ევროპული უსაფრთხოება არამყარია. 2008 წლის აგვისტოში განვითარებული მოვლენები სწორედ ევროპული კონფლიქტი იყო და მას შემდეგ ყველა უნდა ეცადოს ამ უსაფრთხოების გამყარებას", - განაცხადა მედვედევმა.
ამასთან, ის გერმანელ ჟურნალისტებთან საუბრისას ევროპული უსაფრთხოების საკუთარ ინიციატივას კიდევ ერთხელ შეეხო და ხაზი გაუსვა, რომ ამ დოკუმენტის ხელმოწერა პოზიტიური იქნება, როგორც ნატო-ს წევრი ქვეყნებისთვის, ასევე მათთვის, ვინც ალიანსში არ შედის.
რაც შეეხება დემოკრატიულ ფასეულობებს, დიმიტრი მედვედევის თქმით, რუსეთს იგივე დემოკრატიული ფასეულობები აქვს, რაც ევროპას და მათ შორის თითქმის არანაირი განსხვავება არ არსებობს.
გარდა ამისა, მედვედევმა ხაზი გაუსვა, რომ პრობლემები, რომლებიც ევროპაში არსებობს, დასავლეთმა და რუსეთმა ერთად უნდა გადაწყვიტონ.
