ხელისუფლებამ საზოგადოების მოთხოვნას უნდა უპასუხოს და თეა წულუკიანი მთავარი პროკურორის შერჩევის პროცესის ერთ-ერთი მთავარი მონაწილე აღარ უნდა იყოს, –ამის შესახებ პრეზიდენტის საპარლამენტო მდივანმა, ანა ნაცვლიშვილმა განაცხადა.
მისი თქმით, თეა წულუკიანი არის მინისტრი, რომელიც პასუხისმგებელია მართლმსაჯულების სისტემაში შექმნილ ძალიან მძიმე მდგომარეობასა და ბევრ სხვა წარუმატებელ პროცესზე.
„დიდი ხანია, დღის წესრიგში დგას იუსტიციის მინისტრის საკითხი, რადგან ის არის პირი, რომელიც მოქმედი კანონმდებლობის საფუძველზე წარადგენს მთავარი პროკურორის კანდიდატურას. საზოგადოების ძალიან დიდი ჯგუფი მოითხოვდა იუსტიციის მინისტრის არყოფნას მინისტრთა კაბინეტში. ეს არის მინისტრი, რომელიც პასუხისმგებელია მართლმსაჯულების სისტემაში შექმნილ ძალიან მძიმე მდგომარეობასა და ბევრ სხვა წარუმატებელ პროცესზე. აქედან გამომდინარე, პირველ რიგში, საზოგადოების ამ მოთხოვნას უნდა უპასუხოს ხელისუფლებამ და წულუკიანი აღარ უნდა იყოს პროცესში ერთ-ერთი მთავარი მონაწილე. თუ ის წარადგენს მთავარ პროკურორს, არანაირი მნიშვნელობა არ ექნება, ვინ იქნება მთავარი პროკურორი“, – განაცხადა ანა ნაცვლიშვილმა.
