ბატონ ზაზა ხატიაშვილთან ერთად პროკურატურაში განცხადება შეგვაქვს, რითიც გამოძიების დაწყებას ვითხოვთ ყოფილი მთავარი პროკურორის, ირაკლი შოთაძის, ასევე დიდუბე-ჩუღურეთის რაიონული პროკურორის, ნიკოლოზ დგებუაძის და ყოფილი პროკურორის, მილენა მითაიშვილის მიმართ რაფალიანცის საქმის მტკიცებულებათა სავრაუდო ფალსიფიკაციის თაობაზე, - განაცხადა „ჯი-ეიჩ-ენთან“ ადვოკატმა ინგა არახამიამ.
აღნიშნულთან დაკავშირებით, ის მთავარ პროკურატურაში განცხადებას რამდენიმე წუთში შეიტანს. როგორც არახამია განმარტავს, მისი დაცვის ქვეშ მყოფის თქმით, ყოფილმა პროკურორმა მილენა მითაიშვილმა, მეუღლეს რაფალიანცის სისხლის სამართლის საქმის მასალები წააკითხა და ამას გარდა, მოუყვა, თუ რა დაგეგმეს შოთაძის კაბინეტში.
„მე ვიცავმ იმ ადამიანის ინტერესებს, ვინც მოწმე გახლავთ და ამხელს ბატონებს, ირაკლი შოთაძეს, ნიკოლოზ დგებუაძეს და ქალბატონ მილენა მითაიშვილს სავარაუდო დანაშუალის ფაქტზე.
ამა წლის 19 მაისს, „რუსთავი2“-ის ეთერში, შაბათის კურიერში გასული სიუჟეტით ირკვევა, რომ სწორედ შოთაძის კაბინეტეში დაიგეგმა ამ საქმის ფალსიფიკაცია. ვიმედოვნებდით, რომ მასმედიის საშუალებებით გავრცელებული ინფორმაციის საფუძველზე გამოძიებას დაიწყებდნენ, რაც კანონით იმპერატიული მოთხოვნაა. თუმცა, ასე არ მოხდა.
ჩვენს ხელთ არსებული ინფორმაციით, ერთ-ერთი მოწმის მეუღლემ, ყოფილმა პროკურომა მილენა მითაიშვილმა სახლში სისხლის სამართლის საქმე მიიტანა და მეუღლეს მოუყვა, თუ რა დაგეგმეს. ამ პიროვნებას საქმეში არსებული მასალებიც აქვს წაკითხული, რომელიც პირადი ცხოვრების შესახებ ინფორმაციას შეიცავს. მითაიშვილმა ეს ინფორმაცია მეუღლეს წააკითხა.
ქალბატონმა მილენამ უარყო, რომ ამ საქმეზე საპროკურორო ზედამხედველობას აწარმოებდა. მთავარმა პროკურატურამ კი დაადასტურა, რომ ნამდვილად აწარმოებდა საპროკურორო ზედამხედველობას. ამას ობიექტური, სრულყოფილი და ყოველმხრივი გამოძიება სჭირდება“, - აცხადებს არახამია.
როგორც ის აღნიშნავს, თუკი, ყოფილი მაღალჩინოსნების მიმართ სისხლის სამართლის დანაშაულის ნიშნები გამოიკვეთა, მათი პასუხისმგებლობის საკითხი უნდა დადგეს.
„ამ პირების მიმართ გამოძიება უნდა დაიწყოს და თუ მოპოვებული იქნება შესაბამისი მტკიცებულებები, რომ მათ ეს დანაშაული ჩაიდინეს, ბუნებრივია, ამ პირების პასუხისგებაში მიცემას მოვითხოვთ“, - დასძენს ადვოკატი.
