"ხორავას ქუჩაზე მომხდარი დანაშაულის შემსწავლელი საგამოძიებო კომისია სერიოზულად არ მუშაობს. დღეს ჩვენ ამდენ დროს ვხარჯავთ ნახევრად იურიდიულ, ნახევრად პოლიტიკურ დებატებში იმ დროს, როცა მთავარი მოწმეები არ არიან დაკითხული,“ - ეს განცხადება დღეს პარლამენტის საგამოძიებო კომისიის წევრმა, სალომე ზურაბიშვილმა კომისიის სხდომაზე გააკეთა.
მისი თქმით, კომისიის მთავარი მიზანი ხორავას საქმის გარემოებების გამოძიება უნდა იყოს, რაც ამ ეტაპზე, მისი თქმით, არ ხდება.
„რამდენიმე დღეა, მე სულ ამას ვკითხულობ, როდის იქნებიან არასრულწლოვნები დაკითხული იმ ფსიქოლოგთან ერთად, რომელთანაც შევთანხმდით. ეს არის მთავარი, რისთვისაც ეს კომისია შეიქმნა. კომისია შეიქმნა იმიტომ, რომ გამოიძიოს და არა იმისთვის, რომ გაანალიზოს არსებული მასალები. ეს არის მნიშვნელოვანი ნაწილი, მაგრამ უფრო მნიშვნელოვანი ნაწილი არის ჩვენი გამოძიება," - განაცხადა მან.
გარდა ამისა, ის „ევროპული საქართველოს“ რეკომენდაციებსაც აპროტესტებს. „ამ შვიდი სხდომიდან არც ერთი არ ყოფილა ჩვენი ანალიზისთვის დათმობილი, სადაც ერთად ვიმსჯელებდით ამ მასალებზე. თქვენ რეკომენდაციები დაწერეთ თვითონ, ამ ჯგუფმა და აქ არის უკვე პოლიტიკური ნაწილები, რომელშიც მე არ ვერევი, მაგრამ, ეს არ არის, თუნდაც, კომისიის მსჯელობის შედეგი. საზოგადოებამ უნდა იცოდეს, რომ ეს რეკომენდაციები თქვენმა ჯგუფმა დაწერა და ეს არ არის კომისიის მსჯელობის შედეგი,“ - აცხადებს ზურაბიშვილი.
ის აცხადებს, რომ კომისიის გადაწყვეტილება შეთანხმებით უნდა იყოს მიღებული. „დავკითხოთ ის აუცილებელი მოწმეები, შემდეგ შევიკრიბოთ და გავაანალიზოთ. რაც იქნება საჭირო ის რეკომენდაციები მივიღოთ. იმისთვის, რომ ამ კომისიის მიმართ არსებობდეს ის აუცილებელი ნდობა, რომელიც გვჭირდება, უნდა იყოს მიღებული კონსენსუსით. ეს არის თქვენი პასუხისმგებლობა, რომ მივაღწიოთ ამას. ამ საქმემ რომ მართლა მიაღწიოს თავის მიზანს, რაც არის სიმართლის დადგენა,“ - განაცხადა სალომე ზურაბიშვილმა.
