დილით ისესხა ფულადი თანხა პირადი მოხმარებისთვის, არ ჰქონდა თანხა ირაკლის და სჭირდებოდა დღის განმავლობაში სამოძრაოდ. საღამოს უნდა დაებრუნებინა, დროულად ვერ მოახერხა და მიიღო აგრესია ბრალდებულისგან. ფაქტია, რომ იყო ვალის თემა, - განაცხადა ჟურნალისტებთან ჯგუფ "ქუჩის ბიჭების" სოლისტის, ირაკლი ნოზაძის ადვოკატმა, ნიკა სადრაძემ.
ირაკლი ნოზაძის გამოკითხვას გამომძიებლები დღეს ღუდუშაურის კლინიკაში რამდენიმე საათის განმავლობაში აწარმოებდნენ. როგორც მომღერლის ადვოკატი განმარტავს, ნარკოტიკებთან დაკავშირებით გამომძიებლებს ნოზაძესთან კითხვები არ ჰქონიათ.
"გამომძიებელს აინტერესებდა რა მოხდა რეალურად, რა ვითარებაში და როგორ მიიღო დაზიანებები. ირაკლი ნოზაძემ, როგორც დაზარალებულმა დეტალურად აღწერა როგორ, რა ვითარებაში და ვისი მხრიდან მოიიღო ის დაზიანებები, რის გამოც საავადმყოფოში აღმოჩნდა. ნარკოტიკულ საშუალებებზე კითხვა არ დასმულა, თუმცა, იყო საუბარი იმაზე თუ რა ტიპის ურთიერთობა იყო. ირაკლის პოზიციაა, რომ ამ საქმეში ნარკოტიკის თემა არაფერ შუაშია, ამის გამო კონფლიქტი არ მომხდარა. კონფლიქტი მოხდა ვალის გამო და შესაბამისად, აქედან წარმოიშვა შელაპარაკება, რის შედეგადაც ირაკლი ნოზაძემ მიიღო დაზიანებები.
მე არ ვიცი ბრალდებული რას ამბობს, დაზარალებულის სიტყვებით, ნარკოტიკების თემა აქ არაფერ შუაში არაა. ეს არის ჭორი და ალბათ ამ საქმის მისტიური და სკანდალური მხარე. მის მიმართ მომხდარია დანაშაულებრივი ქმედება, ბეწვზეა გადარჩენილი. ბრალდების მხარე ვალდებულია დაადგინოს ვინაა ამ ქმედებაში დამნაშავე. ამ საქმეს სხვა მხარე არ აქვს საერთოდ. მე ბრალდებულის ნათქვამს და მის ქმედებას ვერ შევაფასებ, რაში დასჭირდა ან ერთის თქმა, ან მომავალში თუ რაიმეს იტყვის რაში დასჭირდება", - განაცხადა ადვოკატმა.
შეგახსენებთ, რომ ირაკლი ნოზაძე 25 ივნისს, საღამოს, წერეთლის გამზირზე ცივი იარაღით დაჭრეს. მას ღუდუშაურის კლინიკაში ოპერაცია ჩაუტარდა. მომღერალი ხელოვნური სუნთქვის აპარატიდან 27 ივნისს მოხსნეს.
ნოზაძის განზრახ მკვლელობის მცდელობასა და დანაშაულის შეუტყობინებლობაში ბრალდებულ ორ ქალს, თამთა ჯანჯღავასა და ნათია თოფურიას თბილისის საქალაქო საასმართლოს გადაწყვეტილებით, გუშინ პატიმრობა შეეფარდათ.
