ხორავას ქუჩაზე მომხდარი მკვლელობის საქმეში სამწუხაროდ, კიდევ უფრო მეტი კითხვის ნიშანი გაჩნდა, - ამის შესახებ პარლამენტის საგამოძიებო კომისიის თავმჯდომარე სერგი კაპანაძემ განაცხადა.
მისი ინფორმაციით, შაბათს კომისია შეხვედრას გამართავს სახალხო დამცველთან და არასამთავრობო ორგანიზაციებთან.
„სამწუხაროდ, ძალიან ბევრი კითხვა, რომელიც ჩვენ დავსვით რჩება პასუხგაუცემელი. კიდევ უფრო სამწუხარო ის არის, რომ საქმეში მეტი დამატებითი კითხვა გაჩნდა. ჩვენ გავაგრძელებთ საჯარო შეხვედრებს და ეს იქნება გაცილებით ვიწრო ფორმატში. ასევე შეხვედრები გვექნება სრულწლოვან თვითმხილველებთანაც. კომისიის სრულ ფორმატში შეხვედრა შაბათს არასამთავრობო ორგანიზაციებთან და სახალხო დამცველთან გაიმართება. ამის შემდეგ კომისიის წევრები დეტექტივების კონკრეტული ჯგუფის უფროსს გამოვკითხავთ“, - განაცხადა სერგი კაპანაძემ.
