დაუშვებელია, სახალხო დამცველის ოფისმა იმ ქვეყანაში ფუნქციონირება შეწყვიტოს, სადაც ვამბობთ, რომ ადამიანის უფლებები უმაღლეს რანგშია აყვანილი, - ამის შესახებ პარლამენტის ადამიანის უფლებათა დაცვის კომიტეტის თავმჯდომარე სოფიო კილაძემ განაცხადა.
სოფიო კილაძე შესაბამის სტრუქტურებს მოუწოდებს, სახალხო დამცველის ოფისის თაობაზე ღირსეული რეაგირება მოახდინოს.
მისივე განცხადებით, რამდენიმე თვის წინ, სახალხო დამცველის ოფისთან დაკავშირებით ყოფილ ფინანსთა და ეკონომიკის მინისტრებთან კონსულტაციები გამართა.
"საუბარი იყო იმაზე, რომ ფართი უნდა გამოყოფილიყო, რადგან დიდი ხანია, ეს შენობა ავარიულ მდგომარეობაშია. მაშინ კონკრეტულ ფართზე შეთანხმება ვერ მოხერხდა, რადგან სახალხო დამცველისთვის ადგილმდებარეობა არ იყო მოსახერხებელი. ახლა კი, სახალხო დამცველმა ფუნქციონირება შეწყვიტა. შესაბამის სტრუქტურებს მოვუწოდებ, რომ ამაზე რეაგირება ღირსეულად გააკეთონ, რადგან დაუშვებელია, სახალხო დამცველის ოფისმა იმ ქვეყანაში ფუნქციონირება შეწყვიტოს, სადაც ვამბობთ, რომ ადამიანის უფლებები უმაღლეს რანგშია შეყვანილი. მნიშვნელოვანია, სახალხო დამცველს მუშაობისთვის ადეკვატური გარემო ჰქონდეს, რათა ადამიანის უფლებები დაიცვას", - განაცხადა სოფიო კილაძემ.
ცნობისთვის, სახალხო დამცველის აპარატი დროებით სამუშაო პროცესს აჩერებს. აღნიშნულის მიზეზი სახალხო დამცველის აპარატის შენობის ავარიულობაა.
