„მმართველ გუნდში ყველაზე მეტი კითხვა განათლება-კულტურის სამინისტროების შერწყმამ გამოიწვია,“ - ეს განცხადება საპარლამენტო უმრავლესობის წევრმა, დავით ჭიჭინაძემ, დღეს ჟურნალისტებთან მთავრობის სტრუქტურული ცვლილებების საკითხზე კომენტირებისას გააკეთა.
მისივე თქმით, „სტრუქტურულ ცვლილებებთან დაკავშირებით შეთანხმება უკვე მიღწეულია და ყველაფერი ისე იქნება, როგორც ითქვა“. ანუ, გაერთიანდებიან იუსტიციის და სასჯელაღსრულების სამინისტროები, სპორტის, კულტურისა და განათლების სამინისტროები, ხოლო დევნილთა და განსახლების სამინისტრო კი შერიგების და სამოქალაქო თანასწორობის საკითხებში სახელმწიფო მინისტრის აპარატს შეუერთდება. თუმცა, მისივცე თმით, მმართველ გუნდში ყველაზე მეტი აზრთა სხვადასხვაობა განათლება-კულტურის სამინისტროების გაერთიანებასთან დაკავშირებით არსებობდა.
"იყო აზრთა სხვადასხვაობა, თუმცა, პრემიერ-მინისტრს თავისი არგუმენტები გააჩნია და უმრავლესობამ გაიზიარა ისინი. სამშენებლო ნაწილი წავა ინფრასტრუქტურაში და ეს ძალიან მნიშვნელოვანია. დევნილების ნაწილი სოციალურ ნაწილში გადავა ჯანდაცვაში, ხოლო თავად სახელი წავა შერიგებაში, რათა სტატუსი არ დაიკარგოს. ყველაზე დიდი კითხვები გამოიწვია განათლება-კულტურის შერწყმამ. ორივე მხარეს მოჰყავს არგუმენტები და საკმაოდ წონადი არგუმენტები გააჩნიათ და ალბათ, უფრო სესიაზე გამოჩნდება ეს ყველაფერი," - განაცხადა დავით ჭიჭინაძემ.