მკვლელობის პირველივე დღეს, დასახელებული იყო ის სამი პიროვნება, რომელთაც ჩემს შვილზე დანა აღმართეს, ესენია გ.ჯ, მ.კ და მღვდლის შვილი, – ამის შესახებ ხორავას ქუჩაზე მოკლული დავით სარალიძის მამა, ზაზა სარალიძემ საგამოძიებო კომისიის მესამე სხდომაზე განაცხადა.
მისი თქმით, რამდენიმე ხანი დამჭირდა, ზუსტად გაერკვია, ეს პიროვნებები ნამდვილად იყვნენ თუ არა, რაც ნამდვილად დადასტურდა ყველანაირად, არამხოლოდ მისი მხრიდან, არამედ გამოძიების მხრიდანაც.
მისივე თქმით, პროკურატურამ თვითონ დაანახა მას ეს პიროვნებები ვინ იყვნენ და რა იყვნენ.
სარალიძის ინფორმაციით, ინციდენტი სკოლის ტუალეტიდან დაიწყო.
„ინციდენტი დაიწყო სკოლის ტუალეტიდან. როგორც ვიცი, ჩემი შვილის მეგობრებმა შეაშინეს თუ რა უქნეს, არ ვიცით სრული ისტორია, არც ერთი მხარე არ ყვება სრულ ისტორიას. ზოგადად, ვიცი, რომ პისტოლეტით შეაშინეს ერთი მოსწავლე, რომელმაც დასახმარებლად დაუძახა დეიდაშვილს, იმან თავის მეგობრებს და წამოვიდნენ, მაგრამ საინტერესო ისაა, რომ აქ რა კითხვაც დამებადა და რასაც პასუხი ვერ გავეცი, არის ის, რომ როცა ა.ს-მ დაურეკა მ.კ-ს, არავინ იცის, რა ინფორმაცია მიაწოდა მას, რის საფუძველზე უნდა მოსულიყო მ.კ და მისი მეგობრები, რა უძღოდა წინ ამ საქმეს, არავინ იცის, ამაზე არავინ ლაპარაკობს.
ჩემი ინფორმაციით, ა.ს-ს ძალიან არარეალური ინფორმაცია აქვს მიწოდებული მ.კ-სთვის, იქიდან გამომდინარე, რომ ფაქტია, ხორავას ქუჩაზე ყველა მოსულს ჰქონდა იარაღი მაშინ როცა, პატარა ბავშვები არ დადიან იარაღით, მითუმეტეს სკოლის პერიოდში. აქ მიჩნდება ეჭვი, რომ ეს იყო შეგნებულად გადადგმული ნაბიჯი, რომ იქ ვიღაც უნდა დაჭრილიყო“, – განაცხადა ზაზა სარალიძემ, რომელმაც აქვე აღნიშნა, რომ კონფლიქტის რაღაც ეტაპზე მხარეების შერიგებაზეც იყო საუბარი, რა დროსაც, მის შვილსა და გ.ჯ-ს შორის ვითარება დაიძაბა.
„ზოგი ამბობს, რომ ჩემმა შვილმა შეაგინა და სიგარეტის ნამწვი ესროლა. რატომ შეაგინა, ვიცი, ამასაც ვიტყვი. გ.ჯ-მ ხელი აუქნია დათოს, არ ვიცი, შეიძლება, შემთხვევით აუქცია და მოხვდა რასაც, ალბათ, იუკადრისებდა პატარა ბავშვებს ხომ არ გააჩნიათ უკან დახევის უნარი. რატომ აუქნია ხელი და რა მოხდა, ამას არავინ ამბობს, ფაქტია, დაიძაბა სიტუაცია ჩემს შვილსა და გ.ჯ- ს შორის“, –დასძინა ზაზა სარალიძემ.
მისივე თქმით, მისთვის გაუგებარია, რატომ ურტყამდა ყველა დავით სარალიძეს, როდესაც მის გვერდით სხვა მოსწავლეებიც იდგნენ, რომელთაც არავინ შეხებია. მისივე ინფორმაციით, ის მკვლელობის დღეს ესაუბრა თავის შვილის ორ მეგობარს დ.ნ-სა და დ.ღ-ს, რომლებიც კონფლიქტში მონაწილეობდნენ.
„ვიცოდი, რომ ეს ბავშვები რაღაცას იტყუებოდნენ, მკვლელობის ნაწილში საერთოდ არეულები იყვნენ და არაფერს ლაპარაკობდნენ. ფაქტია, მკვლელობის ნაწილს მალავდნენ თავიდან ბოლომდე“, – აღნიშნა ზაზა სარალიძემ.
